媽咪姐手帳
自古以來都說:「娶妻求淑女!」梗係無錯啦!話說12月6日無綫高層梁家樹愛女Toby梁靖琪同圈外富貴男友黃敏豪結婚,當晚一對新人high爆,擺完酒仲搞after party,第二朝五點先散場,Toby飲咗唔少,而佢老公直情貓到斜曬。
不過未得閒去honey moon嘅Toby,第二日下午酒氣稍過,就急住一個人由清水灣道愛巢,專程揸車落九龍城街市買餸煮飯過老公食。三兩下手勢就買齊遊水魚、豬肉同菜,似乎煮幾味家庭小菜,對佢嚟講絕對無難度。行多兩步,買多塊金華火腿,相熟嘅南貨舖店員仲輪流握手恭喜佢,呢個初歸新抱人緣真係好嘞!咦,唔知塊火腿收唔收錢呢? ####
醉醉哋去買餸, 仲有feel!(設計對白)
最後去南貨舖, 個個員工都笑曬恭喜。睇笑容就知,Toby平時對人幾唔錯啦!
新郎哥開到口話ready生仔,Toby又咁enjoy做主婦,睇嚟好快就會有好消息。
855期