媽咪姐手帳
媽咪姐除咗係TVB粉絲之外，得閒當然都會煲吓韓劇。我哋呢啲，有國際視野㗎嘛！所以，早幾日收到闊太朋友電話，話喺中環見到憑電視劇《宮》同《咖啡王子》而紅咗嘅尹恩惠，即刻一支箭標去一睹韓星風采。
嘩！見佢喺中環名店MCM「濕平」，巡勻成個場，件件摸吓睇吓，唔使廿分鐘，掃咗銀包、手袋同記事簿等等，咁就使咗幾萬蚊。不過呢啲小意思啫， 尹小姐已經係韓國一線女星，睇佢出出入入好似操兵咁有咁多人傍住，就知好多人跟佢搵食，咁就梗要促進埋香港經濟發展啦！ ####
《宮》係近年大受歡迎嘅青春韓劇，尹恩惠亦因此大紅。不過，講到「濕平」，佢同大家一樣，鬼咁開心， 攞住本記事簿都唔捨得放手。
無論揀衫定出門口，都有至少三、四個人傍住，仲有開路先鋒㖭！韓星嘅排場真係勁。
不過，始終人生路不熟，搞錯等車地方，要喺條街食十五分鐘西北風，陰功豬咯！
855期
