同你吟一吟
上個禮拜二（十二月十三日）無綫行政主席梁乃鵬請食飯，慰勞《法證先鋒III》一班演員。能夠成為全年收視最高劇集，金牌監製梅小青絕對功不可沒，會唔會打鐵趁熱開拍第四輯？八珍未收到風，不過就算要拍，都唔再係小青姐做監製。
出面已經吹曬風，小青姐將與同樣係金牌監製嘅老公劉家豪離開無綫，兩公婆大約明年三、四月就會齊齊過now做戲劇組揸fit人，聽聞人工多幾倍，無綫淨係講心唔講金，叫埋陳志雲出面留人都無用。唔知將來有冇機會合作，搞到餐慰勞宴變成小青姐歡送會，演員輪流捉住佢影合照咬耳仔，尤其係黎耀祥，日日忙住拍新劇《造王者》，攰到殘樣出曬，但一嚟到都第一時間拖實小青姐手仔密密斟。又難怪，有傳小青姐打算盡收約滿無綫一線小生花旦過now，為日後開劇做足準備，當中合作無間嘅佘詩曼係不二之選，既然祥仔同無綫得番一年約，同小青姐打定招呼，正常！
高層樂易玲一見到小青姐就攬到實，其他演員又爭住同佢影合照，搞到慰勞宴變歡送會。 ####
不如過now開套《法證急先鋒》！（設計對白）都得喎！（設計對白）攰到三眼肚嘅黎耀祥，捉住小青姐手仔傾完又傾，關係好，將來過now再合作唔出奇！
1137期
