同你吟一吟
憑《那些年》人氣爆升嘅柯震東，乖乖仔形象冧盡天下少女，但實情柯震東真人貪玩又爛蒲，早排又俾人影到蒲天光先至返屋企。得嗰二十歲，柯震東唔只爛玩，最近仲買咗架法拉利F430 spider開篷辣跑，响班friend面前曬命。
上個禮拜六、日（十二月十七、十八日），柯震東一連兩晚約朋友半夜出動遊車河，展示台灣車價要二百九十萬港元嘅新玩具。柯震東好大方，唔介意借俾朋友兜圈揸番轉，感受法拉利嘅威力，又會自己做司機，載朋友遊車河，柯震東手車仲好辣，台灣《壹》仔想追佢燈尾都無能為力。雖然有報導指柯震東身價幾十級跳，片酬由十萬台幣升到一百萬港元，但八珍聽講柯爸爸一定要個仔返學讀書，搞到柯震東到現時為止，只係拍咗一個廣告加五個商業活動，扣除經理人抽傭，柯震東最多得幾十萬港紙落袋，但居然有本事買到架百萬跑車，擺明先使未來錢。
玩完車，再約班朋友去港式茶餐廳消夜，雖然同枱有幾位辣妹，不過俾人影過夜蒲攬女嘅柯震東，已經謝絕女色，遊車河更加只限男性，女生一律拒載。 ####
下次買林寶！（設計對白）早排柯震東嚟香港出席珠寶活動，聽講酬勞有100萬港元，可惜呢類搵錢機會唔多，因為柯震東大部分時間都用嚟返學，曠工不曠課！
柯震東手車相當辣，更無理會當晚落住毛毛雨，淩晨時分載住朋友四圍極速遊車河！
柯震東借出百萬大玩具俾朋友兜圈玩番轉，之後朋友落車幫佢同架法拉利影合照。
1137期
