媽咪姐手帳
臨近聖誕，莫講話一街都係自由行，就連的士站十個有九個都係講普通話嘅。
前幾日媽咪姐經過銅鑼灣利園，見到的士站有個「豹紋阿姐」好sharp醒。媽咪姐正驚訝國內同胞愈來愈潮之際，先發現原來佢係我哋香港潮媽代表徐濠縈。佢一邊排一邊勁唔耐煩，心情相當差。不過咁又好難怪嘅，平日出入有保母車接送，好有派頭；家吓要降呢同人爭的士，我係阿徐都即刻玩電話遮醜囉。
有其父必有其子女
講起徐濠縈，梗係要講吓佢同Eason嘅寶貝女康堤。早前微博流出一張康堤同霆鋒大仔Lucas嘅合照，好多童鞋不約而同諗起1999年Eason同霆鋒喺《勁歌金曲》扮日本女子組合Puffy嘅情景（下圖）。不過亦有網友攞霆鋒同王菲嘅陳年戀情開玩笑，仲留言：「如果Lucas同李嫣（王菲細女）在一起……」哈，唔通做唔成情侶可以做親家？ ####
等的士期間，阿徐不斷玩電話，不過玩之餘又要四圍望，睇吓有冇人望佢。
可惜吖，阿徐排咗十分鐘，身邊冇一個同胞認得佢，認真唔俾面。
康堤同Lucas排排企影相，超級可愛。
856期
