媽咪姐手帳
淡出娛圈多年嘅張燊悅，同教育局政治助理楊哲安生咗兩個女之後，專心湊女做全職媽媽。最近佢復出拍奶粉廣告，仲帶埋兩個寶貝女Lucy（2歲10個月）同Lily（14個月）齊齊搵銀。
拍攝當日，張燊悅拖一個、抱一個走入街市，熟曬架步咁款，大女就全程負責俾錢，鬼咁醒目。原來佢鍾意活動教學，覺得小朋友喺3歲前吸收得最快，不時帶囡囡去街市學嘢，佢話︰「我得閒時都會同囡囡一齊感受生活，俾佢哋感受吓街市嘅氣氛，都算係遊學之旅，可以做個榜樣，俾佢哋知道事事都要親力親為。」 啱㗎！如果太照顧周到，咪盞變「港孩」，媽咪姐buy你呀。 ####
奶粉錢唔易搵！咪跌錢呀，囡囡。（設計對白）去到魚檔俾錢嗰陣，大女Lucy唔小心跌咗個十蚊落地，搞到張燊悅鬼咁狼狽。
楊太習慣拖一個抱一個去街市買餸，仲教識大女Lucy負責俾錢，呢個媽咪好犀利！
一向瘦底嘅張燊悅，生咗兩個女都仲好fit，就算借嚟嘅高踭鞋大咗成個碼，擺甫士都冇難度！
855期
