媽咪姐手帳
緊貼時代脈搏嘅媽咪姐， 又係時候同大家講吓特首選戰嘅情況嘞！話說星期一（19日）唐英年終於搞咗個造勢大會， 政商娛樂界猛人雲集，個個坐定定，聽「講嘢唔係叻」嘅唐唐，講足半個鐘。
Zzzzz，不如都係講番啲星！媽咪姐想話， 當日一會，就知星爺周星馳嗰15億身家，真係得來不易。俾人等慣嘅佢，當日晨咁早就着住成套西裝去到灣仔會展，四萬咁口同綵排緊嘅唐唐打氣！係着開白底衫嘅星爺呀，cool開嘅星爺呀！而造勢會後，佢亦一反常態，笑騎騎咁同場內人士social，nice到不得了。啱嘅，嗰日出席嘅，非富則貴！而且，呢個係疑似未來特首唐唐個場喎，做咗上市公司執行董事嘅星爺無計錯數嘅。嗱嗱嗱，遲曬到嘅黎明，真係要學嘢嘞！
星爺搏盡
其他嘉賓未到，星爺已經仆到去會展撐唐唐場， 仲有份同前經濟發展及勞工局局長葉澍堃（左一）等猛人拍短片， 俾足面嘞！
黎明例遲
例遲嘅黎明， 去撐場都遲！不過，今次遲咗大約五分鐘啫， 算少嘞， 但俾入曬場嘅嘉賓望住曬，肉酸囉。
媽咪姐好想問吓「政壇黎明」唐唐，佢嘅競選金句：「明天在你我」其實想講乜呢？在你我啲乜嘢先？「正牌金句王」黎明都聽到皺曬眉㗎。
造勢會後，當唐唐忙住同支持者握手，星爺亦努力hold住個笑容同其他嘉賓social。
香港傷殘運動員餘翠怡見到黎明同星爺，即刻拉住想影合照， 黎生周生交換咗個眼神， 就叫助手子泉揸機。你又想影？你識唔識唐唐先？ ####
明天在你……有幾俾面……我囉！（設計對白）
856期
