過江龍
年尾又到各大歌手出力爭獎時刻，一線歌手鬥餐死，其實新人獎一樣爭崩頭。
來自大馬的過江龍Gin Lee（李幸倪）今年俾bma老闆羅傑承收歸旗下，去年喺《巨聲2》單挑巨肺林欣彤一鳴驚人，最近更大變身正式出戰香港出碟。新人獎對手最大敵人又係林欣彤，難得Gin話唔怕挑戰勁有信心，Gin、Mag有排鬥呀！
去年Gin Lee（李幸倪）喺《超級巨聲2》踩場與Mag（林欣彤）對唱，最終Mag以G.E.M.嘅〈A.I.N.Y.〉一曲擊敗Gin。雖然敗北而回，但唱得Gin Lee卻因此在港響朵。
再挑林欣彤
剛於10月出碟的Gin，年尾發力穀行廣告攻勢，擺明爭新人獎，不過幾位今年大熱都係唱得之人，咁啱頭號大敵又係林欣彤。寃家路窄，但Gin仍有風度：「我當然好想攞獎，而且我都好有信心。Mag算係我嚟香港之後第一個認識嘅朋友，都想佢攞嘅。」
變靚靠化妝
來自馬來西亞的Gin喺《巨聲2》中擺明賣靚聲，不過一到港卻忽然變靚曬，仲有網友話佢索到似阿嬌。對於網民一致好評，Gin就話：「我自己真係唔覺（似阿嬌），朋友或者親戚都唔會話我似，其實我都唔介意俾人話似邊個邊個嘅，作為新人好多時都會遇到呢個問題，遲啲等人哋熟悉我就唔會啦。其實大家覺得我變靚咗，純粹係化妝團隊嘅力量，佢哋幫我執過曬啲形象，要多謝佢哋！」樣靚咗，上台都自信啲啦！
執靚似阿嬌
唱歌除咗靠聲，講真個「勾look」都好緊要，所以Gin攻港第一件事就係執靚個索樣，最近張宣傳海報索到似阿嬌，難怪網友都話睇張poster完全唔認得佢。 ####
改名闖樂壇
嚟香港前，Gin原本叫Jeanie，年中簽約香港bma唱片公司後先改叫Gin Lee，她說：「公司想有新感覺畀到觀眾！」
頭號敵
去年，Gin曾跟Mag喺《巨聲2》PK戰中挑戰小巨肺，今年新人獎再遇，Gin說：「佢唱歌好叻好好聽，佢係我香港第一個朋友，我都想佢攞！」
大熱腳
今年新人獎除咗有Mag呢個強勁對手外，欣宜都算另一大敵，Gin話：「佢唱咗好耐歌，我都有聽過，佢都唱得好好！」
未聽過
至於另一新人獎黑馬許廷鏗，Gin卻說：「我同佢唔熟，都未聽過佢唱歌，冇意見！」
老闆娘錫曬
bma老闆娘梁芷珊好睇重Gin，除咗幫手執靚外，更租咗南區豪宅貝沙灣畀Gin做宿舍，呢方面就幸福過仲住緊居屋嘅Mag囉！圖片
曬長腿自問冇𡃁模身材嘅Gin，唔露事業線都可以show吓長腿，佢話：「我都有42吋㗎。《蘋果日報》圖
大馬過江龍來自馬來西亞嘅Gin Lee（李幸倪）自細鍾意運動，但喺父親建議下喺大學主修聲樂及編曲。09年，Gin喺大馬出過國語專輯《One & Only》。
改造前有網民將Gin以前嘅相放上討論區，話佢呢個樣好似視後胡杏兒同廖碧兒喎！
改造後由形象顧問幫Gin執過之後，佢由似胡杏兒同廖碧兒，變身似阿嬌。佢成個人唔同曬，塊面瘦咗仲成熟咗，俾網民激讚佢靚女，不過佢稱自己係冇整過容㗎。
同步率70% 鍾欣桐
同步率85% 胡杏兒
同步率80% 廖碧兒
巴士攻勢唱片公司造勢，喺數百輛巴士車身做宣傳，仲命名為「Gin Lee號」，認真揼本。
238期《FACE 週刊》
