FBI File
今年東華騷，除咗超蓮好睇，FBI覺得《天與地》嘅少年陳豪楊潮凱、少年林保怡羅鈞滿、少年黃德斌梁証嘉同死鬼咗嘅家明張景淳，出場唱《天》劇主題曲嗰陣最有高潮。事關現場唔少人都估佢哋做吓樣扮彈樂器撈版位，點知一開聲唱主題曲〈天與地〉時，FBI都打個突，個個冇走音，而且聲底夠厚，絕對rock得起；之後原版陳豪、林保怡同黃德斌先出場唱片尾曲〈年少無知〉，FBI都係覺得嫩版《天與地》樂隊「Sober Band」團火勁啲。
事後FBI都忍唔住大讚佢哋，飾演家明嘅張景淳就怕醜：「多謝曬！其實我哋係第一次唱live，仲要喺班總理面前唱，所以出場前緊張到手心出汗，不過唱咗幾句後唱順咗就好high，大家唱完都話好大滿足感！其實阿Mo同保怡喺後台亦有叫我哋放鬆啲，畀心機唱，我多謝班前輩。」而被人讚係4個唱得最好嘅鼓佬羅鈞滿就話：「其實玩打鼓玩咗2年左右，為咗今次個騷，之前我哋夾咗4日，每日練足5粒鐘練到自己滿意先肯收貨。」咁搏，TVB真係要畀多啲機會佢哋喇。
佬版鬆散
之後先到佬版「Sober Band」出場唱片尾曲〈年少無知〉，當晚陳豪因冇時間綵排，所以唱現場時就要睇住大白板望歌詞。三個人更企喺度一碌木咁，明顯冇夾過。
難得老嫩版「Sober Band」出現，家明張景淳即拉住陳豪、黃德斌及林保怡影合照掟上微博。 ####
嫩版認真嫩版「Sober Band」樂隊，4位band友真玩live冇咪嘴，連fans都讚佢哋靚聲超正，聽完成個人醒曬。左起：楊潮凱（少年陳豪）張景淳（家明）梁証嘉（少年黃德斌）羅鈞滿（少年林保怡）
238期《FACE 週刊》
