買你怕
賀歲片《逆戰》由謝霆鋒及周傑倫孭飛，兩人出名係性格巨星，雖然戲中飾演親生兄弟，不過一行出片場即刻爭餐死。早前有傳霆鋒不滿戲分少過周董，扭計缺席電影宣傳，不過玩嘢在先原來係周董。據知導演林超賢一向屬意由二人合唱主題曲，霆鋒亦贊成，但霸道周董堅持要自己唱曬全首歌。為免順得哥情失嫂意，導演最後決定飛起主題曲，索性「零歌」，一拍兩散。 一句都冇份唱，周董貪字得個貧喎！
首次與金像導演林超賢合作，周傑倫當然想一洗票房毒藥臭朵，戲中九成危險動作親自上陣，而且每次宣傳一定落足鞋油冧導演。「以前我演戲都是把自己當歌手，這次終於做了演員，票房靈藥不敢說，但不要是票房毒藥就好了。不過我相信《逆戰》肯定比我之前的電影票房好很多。其實《青蜂俠》就朝這個方向扭轉了，華語片就靠林導幫我扭轉一下！」身為戲中第一男主角，周董好認真賣口乖。
導演林超賢
導演林超賢否認周傑倫同謝霆鋒不和，但就證實周董確實有同佢自薦作歌，「佢初時對主題曲一事係好興奮，的確有畀過啲建議我，但最後我覺得套戲冇位放主題曲，所以都冇用到！」
秘帶demo講數
戲中搏到盡，視《逆戰》為代表作的周董，連主題曲都想邀功，堅拒同霆鋒合唱。「導演最初好想搵周董同霆鋒一齊唱主題曲，始終一個係台灣天王，一個喺大陸又咁紅，肯定有綽頭！霆鋒一早表態話明合唱冇問題，點知周董嗰邊竟然say no，一時話版權問題，一時又話難度期錄音，總之就諸多藉口！佢仲靜雞雞拎咗大堆demo走去搵導演，話可以親自作曲同搵方文山填詞，拍心口保證首歌肯定hit！」知情人士透露。
女角爆料
女主角林鵬（左）曾向傳媒爆主題曲係由霆鋒同周董合唱，點知最後竟然連主題曲都冇埋，真估唔到！
6月仲係好兄弟
電影喺馬來西亞拍攝期間，當時仲未為爭唱主題曲而面阻阻嘅周傑倫同謝霆鋒，仍然有講有笑。
7月畀面撐一場
《逆戰》今年7月喺北京搞第一個宣傳，霆鋒畀足面導演現身撐場，仲自動企埋一邊費事煩。
11月霆鋒玩失蹤
周董乜都攬上身，霆鋒索性連宣傳都唔去，任得周董一個人撐起成套戲。
搵配樂搭夠
周董自薦本來應該飯應，但同霆鋒四度合作的林超賢，唔想委屈愛將，加上霆鋒知道周董唔合作，亦唔肯妥協，最後導演決定飛起兩位阿哥，破格唔要主題曲，寧願搵金培達負責配樂搭夠。似足小學雞爭嘢，最終得個桔的周董亦承認行動失敗。「其實我自薦了(為電影唱作主題曲)，但被導演拒絕了。現在出來的配樂是搖滾感覺，導演很堅持！」一隻歌都要出招使橫手，好心周董咪咁小器啦！
唔敢分大細
明知兩位阿哥乜都爭一餐，電影公司醒目預備咗幾款海報，除咗一人有一款solo外，其餘嗰款兩個頭都一樣大，唔使拗！
巴閉周董
出名要求高的周董，出道以來麻煩史一大堆，自信爆棚寸人唔使本，加上乜都要威的麻煩性格，多年來得罪過唔少人！
刻薄傳媒
曾經親自作〈四面楚歌〉鬧狗仔隊，周董對記者的態度非常惡劣，遇到唔啱聽問題會發爛渣。06年他的保鑣在日本打記者，車內的周董冇阻止之餘更陰陰嘴笑。
爭化妝師
07年到北京出席活動，當日心情唔好的周董全程唔肯除黑超見人， 喺後台更同S.H.E.爭化妝師用，連女仔都唔讓，真係以為自己大曬喎！
超難服侍
現時自組經理人公司傑威爾的周董，兩度同舊公司新力及阿爾發反面收場；而且周董非常霸道，07年曾發信禁制一本叫《死神愛聽周傑倫》的內地小說出版。 ####
一心想做埋影壇大哥嘅周董，搏曬命拍《逆戰》，其實佢戲分同搶鏡程度都好過霆鋒，無謂為隻歌整衰自己個名啦！
一向唔鍾意爭嘅霆鋒，對周董霸曬成首主題曲睇唔過眼，死都唔肯就範。
周董有畀建議我！真實對白
《蘋果日報》圖片
合照版
獨照版
圖片
《蘋果日報》圖片
台灣《蘋果日報》圖片
239期《FACE 週刊》
