捱世界
《天與地》上週收視平均23點冇升跌，師奶擺明唔buy，不過難得吸納一班後生觀眾全部讚好。陳豪佘詩曼繼續好戲，戲分唔少的五個young版主角更乘勢彈出，人氣拍得住《阿Sir》入面的K4。戲中飾演嫩版阿佘的22歲蔣家旻，一對厚唇似足徐子珊，但入行4年依然做唔到無綫親生女，月薪只得6、7千，比起一個騷收幾萬的姐仔簡直屬赤貧。蔣家旻話慳得一蚊得一蚊，「我平時出街唔會搭的士，仲成年唔敢買衫添呀！」80後咁識慳，好快有錢過阿佘㗎喇！
07年參加Tvbeople入行的蔣家旻，08年開始入無綫拍劇，可惜做極都係細妹或者反叛少女角色唔起眼。難得有機會在《天與地》佔重戲，蔣家旻竟然話當初casting根本唔關心有冇得拍。
服裝間被恰
做極都係三四線，蔣家旻自爆曾經俾人恰：「08年拍《移情別戀》時，我去服裝間換戲服，但入到去服裝阿姐服侍緊其他人唔得閒理我，我問佢攞衫，佢指住地下堆戲服話『啲衫喺嗰邊，你自己摷啦！』我惟有跪低喺地搵囉！」
一試即中
「有個監製介紹我去試角，我嗰時都唔知邊個係戚其義，第一次面試時佢問我鍾意聽咩歌，我話唔聽rock，淨係聽『嵐』（日本偶像組合），臨走前佢話有7成機會用我。我以為又係啲行行企企角色，都唔太關心有冇得拍，點知第二日有電話叫我再見多次阿戚，咁就中咗！」有眼不識金牌監製，蔣亦非常有自知之明，將假想敵的水平定位在黃智雯及龔嘉欣層次。「佢兩個同我同期出道，我冇樣冇身材冇後台，唔通我答你想做陳法拉咩！不過我又唔算太樣衰，所以一定唔會整容！」
逐個數
冇錢畀家用
冇高層照顧，現時與家人同住灣仔的蔣家旻自爆家用都冇錢畀，「我底薪得6、7千，出年5月有新約，會加少少人工，都有8、9千，希望到時可以畀1千蚊家用啦！好在爸爸開物流公司，媽咪做緊秘書，就算屋企得我一粒女都唔使我養家。不過我搵得唔多，所以出街唔會搭的士，又唔會成日出街食飯，有時拍外景食唔曬個飯盒，咪拎埋返屋企繼續食囉，我試過成年都唔敢買衫，有時連啲500蚊嘅衫都要諗過度過呀！」仲唔係新一代慳妹？
入行變索
中學時期嘅蔣家旻唔識化妝，眉粗大鼻似足男人，好在入行後有人幫手執走薯look，當堂似足同樣厚唇嘅徐子珊同舒淇。不過她說：「我唔覺個嘴性感喎！」
兄弟不和鼓佬微博鬧爆家明
戲中人食人，估唔到現實中飾演鼓佬的羅鈞滿及家明張景淳亦充滿怒火。羅週一淩晨忽然在微博寫了大段文字喪鬧有人甩底唔夾band，仲講明「無必要忍你的少爺仔！」據知呢位少爺仔原來係家明張景淳，好在佢事後即刻喺微博公開向三個兄弟道歉，應承唔會再失場。而兩位當事人至截稿前仍未回覆，後生仔真係零舍火爆喎！
《天與地》09年拍落，擺足2年先出街，而劇中幾個版主角家叫做有啲知名度，可惜兩年後嘅今日依然做緊閒角。咁啱五人都有份同黎耀祥、鄭則仕拍《造王者》，希望到時再穀到更多人氣！
未來外母唱衰黃德斌
戚其義愛將、《天》劇演精算師Ronnie的黃德斌，剛與陳豪拍完《天梯》，又會拍阿戚另一套重頭劇《金枝慾孽Ⅱ》，48歲中佬愈演愈有。現時收入有保證，但據知幾年前仍未發圍時，德斌曾被未來外母嫌棄，更周圍向街坊唱衰呢個「半邊仔」。「嗰時黃德斌拍緊《火舞黃沙》，唔使開工就落Joyce（黃的女友）媽咪喺油麻地間時裝店打躉，佢媽咪成日同人呻，話個女要貼錢養仔，跟住呢個男人真係嘥曬！」未來外母睇唔起，德斌上週回應時表現無奈，「我有工作，但唔係好多。其實我同我女朋友媽咪嘅關係冇問題，不過如果有人要咁講我都冇辦法！」自己爭氣咪得囉！
爆《天與地》最堅結局
《天與地》夠破格，大結局會以一個冇對白的MV作結。MV中家明在另一個時空冇死，會與其餘四人重聚。MV意念來自日本殿堂band Mr. Children的〈Kurumi〉（右圖），同樣講一班中佬忽然重拾夾band理想，同套劇超夾！
家明變白頭佬
大結局中，冇被食嘅家明變咗白頭佬，返去同阿Yan團聚，仲會搵番另外三人上天台夾band，而阿佘就會着番蔣家旻嘅妹戲服，紮馬尾扮後生。
轉教結他
原本充滿戾氣嘅陳豪，喺另一個時空會變成斯文男，冇曬紋身，喺社區會堂教結他。
鼓佬生兩仔
「鼓佬」林保怡最幸福，同老婆陳芷菁生咗兩個仔。
繼續專業
本來會變盲嘅黃德斌變化最小，一樣係唔再夾band，專注做精算師。 ####
蔣家旻雖然未上到一線，但非常有堅持，「我試過推劇，因為嗰次要我喺《潛行狙擊》入面做一個俾Bosco攬攬錫錫嘅女仔，一句對白都冇！我覺得我未至於要做到咁，咪同PA講唔想接囉！」
老嫩同場雖然被揀中做嫩版阿佘，但蔣家旻個樣同阿佘其實唔太似。
喺《移情別戀》入面只係做苗僑偉（左）姨仔，咁鬼路人甲，唔怪得俾人踩到上心口！
咪俾我紅到！設計對白自己揀啦！真實對白
玩得「我初時好驚阿佘，但其實佢好玩得！有次班男仔問佢第一套劇係咪《雪山飛狐》，佢即刻笑住答：『做咩呀？想話我做得差呀？係吖，我係做得差喎！』」
細心「陳豪好好人，佢喺十二廠有部咖啡機，試過親自煮畀我哋飲！」
教導「保怡個人好認真，有次走過嚟同班男仔講道理，『你哋夾band嘅水準差咗啲，我哋咁忙都會抽時間練，你哋真係要再努力啲！』」
內斂「德斌份人好文靜，平時喺片場都唔出聲㗎！」
四位band仔於現實亦不時約埋夾band，可惜家明張景淳唔生性遲到，激死羅鈞滿。
有傳黃德斌06年將愛車賣出，套現30萬打本畀女友黃美思開鋪，二人拍拖十幾年，依然非常sweet！圖片
女友睇鋪Joyce親力親為打理位於尖沙咀嘉蘭圍的時裝鋪頭，據知生意唔錯，連栢芝都係熟客仔。
外母幫拖開時裝店嘅Joyce媽，亦不時幫乖女睇鋪。
圖片
與女友同居的西貢南圍村屋，由黃德斌於09年以100萬買入，現時市價約120萬，都叫有樓揸手。
239期《FACE 週刊》
