媽咪姐手帳
自從發生陳嘉桓嘅「餓狼抽水事件」後，媽咪姐覺得娛樂圈嘅好男人愈來愈少。不過少唔等如冇，至少仲有郭晉安！剛拍完《東西宮略》嘅安仔，下個月又要返大陸拍劇。趁有成個月空檔，佢日日做「跟得老公」！周日（11日）仲專登做「柴可夫」，車老婆歐倩怡出席小丸子嘅活動，仲帶埋囝囝令山跟車，兩仔爺喺停車場呆等一粒鐘，等歐倩怡做完活動一齊走。
當日郭太仲甜絲絲咁話：「係呀，佢（安仔）好enjoy家庭生活，就算得半日時間都會湊個仔返學放學。細女依家5個幾月，我仲餵緊人奶，呢排安仔放假，一人湊一個好開心。」
小丸子主題曲係歐倩怡嘅代表作，兩子之母嘅佢依然唱得好cute，仲帶住王友良、少爺占同官恩娜又唱又跳，寶刀未老喎！ ####
湊仔呆等郭晉安帶埋阿仔去活動支持媽咪，不過令山瞓到成隻豬仔咁，兩公婆唔想叫醒佢，所以兩父子留喺車廂內等足個幾鐘。
855期
