娛一叮
楊思琦今年6月狠撇拍拖9年的李泳豪，隨即被揭其實暗裏一腳踏兩船，搭上前香港跳水隊成員吳帥不特止，更加搞到「有餡」收唔到科。即使事後思琦聲淚俱下自辯兼否認有孕，亦難以洗脫勾佬汙名。至於其新歡吳帥，亦連番被起底，指他在港樓都冇層，又欠債走數，更被債主告上法庭。
揀錯爛燈盞的楊思琦，早前一直潛水，近日大話妹終於被拍得投靠身在美國的胞兄，匿在對方家中鬼祟待產。不過已懷胎7個多月的思琦，面容憔悴，看來即使將迎接小生命，她亦唔見得開心。
原本對思琦仍癡心一片的李泳豪，見到舊愛個肚籮咁大，亦不禁死心，但他坦言至今仍未準備接受新戀情，更有感而發：「我覺得佢好落寞好無助，呢個係佢自己嘅決定！」
今年6月，忽然單方面宣布與李泳豪分手的楊思琦，雖然被指秘密劈腿，與吳帥搞上兼珠胎暗結，但事後她企圖以連番大話瞞天過海，自稱4月已與李分手，5月才跟吳帥拍拖，又堅稱自己冇懷孕，其實私底下已經另有盤算。「思琦明知自己個肚再過幾個月就冇得呃，佢7月嗰陣已經同樂易玲申請，話9月完成拍攝《寵愛有家》後，就一定要請假半年，其實佢同TVB個約仲有兩年。早排思琦仲成日登台同出商場騷賺奶粉錢，就算返大陸都照去，到咗9月佢就靜雞雞去美國安胎。」知情者說。
事實上，原本一直與母親居於將軍澳清水灣半島的楊思琦，自9月起就一直「潛水」，直至近日她才被發現潛藏美國，寄居在其胞兄位於L.A.約千三呎的平房待產。思琦雖然穿上厚厚羽絨褸，仍遮掩不到其懷胎7個多月的身形。而當時吳帥亦在旁照顧女友，陪她度過聖誕佳節。
美國使費思琦全包
有指今次思琦遠赴美國，所有食住消費都由自己搞掂，BB經手人吳帥根本不用付出分文。而男方在港更聲名狼藉，指他是空心老倌，在港住劏房及欠屋租，又向跳水隊員及學生家長借錢。即使轉戰內地發展，亦只是黐內地富豪搵食，就連早前李家鼎亦忍唔住話思琦「有眼無珠，上錯賊船」。楊思琦雖然快將臨盆，但她明顯心情欠佳，面容十分憔悴，冇厘精神，與昔日笑開懷大癲大肺的她，判若兩人。看來一心揀「冇水」吳帥過人世的思琦，呢鋪賠上事業兼要倒貼身家，都算賭得大。
李泳豪無奈照拍劇
本周三（28日），甩拖半年的李泳豪得悉舊愛懷胎7個多月的事實，亦顯得甚為無奈。他返電視城為《結•分@謊情式》開工接受訪問時，坦言若思琦需要幫忙，佢一定幫。
李泳豪見相無奈
對於身懷六甲的楊思琦，被傳媒在L.A.拍到大肚真身，本刊向思琦前度男友李泳豪問及此事，他得知舊愛懷孕的事實，顯得甚無奈。忽：仲有冇同思琦聯絡？豪：好耐都冇聯絡……啱啱睇咗啲相，內文未睇，有啲愕然。忽：你同思琦一齊時，其實佢已經同吳帥發生咗關係？豪：唔想再講以前啲嘢，相都出埋喇！呢件事要畫上句號，都已成事實。忽：如果思琦需要你，你會唔會再幫佢？豪：初初發生時我都講過，佢有啲咩要我幫，我能力範圍內一定幫。忽：佢背住你咁樣做，有冇影響你拍拖識女仔？豪：我未ready。忽：係咪驚咗唔敢拍拖呀？豪：始終我都會拍拖嘅，不過依家仲未ready。忽：你係咪覺得思琦喺L.A.好唔開心呀？豪：係，我第一個感覺真係覺得佢好落寞、好無助咁，我對咗佢咁多年都會感受到，睇到有啲唔舒服。忽：吳帥被指欠債，黐飲黐食，依家思琦仲要屈就喺阿哥度生仔，你覺唔覺得輸俾吳帥好唔抵？豪：冇嘢講，唔想再討論，都發生咗，嬲又好、唔開心又好，始終一個女人結婚都係佢揀。佢開心就得，呢個係佢決定。
鼎爺戥思琦陰功
幾乎做了楊思琦老爺的李家鼎，對於思琦懷孕被踢爆講大話一事，他說：「天網恢恢呀！要俾人知嘅遲早會知， 要穿嘅亦遲早會穿，紙係包唔住火嘅！好多是是非非都係佢阿媽搞出嚟嘅，但係天知地知佢哋自己知。如果佢阿媽認為依家咁係最好嘅咪OK囉！不過我就覺得呢個女仔（指思琦）好可憐，都唔知佢將來條路會點行，我戥佢陰功囉！」
網友插爆唔睇好
早前喊曬話自己冇餡嘅楊思琦，大肚終於現形，事實擺在眼前，網友即時插爆。除咗鬧思琦妹擘大眼講大話外，對BB嘅爸爸吳帥亦冇好感。生仔本來係件開心事，但思琦卻未能得到大家嘅祝福。
賺錢靠自己
分手大話連篇
01年港姐冠軍楊思琦，一直形象正面，入行後與李泳豪拍拖亦專一， 奈何一次出軌， 就令她形象破產，不單止大話連篇， 更與李家掀起駡戰。◎單方面宣布分手今年6月尾，楊思琦突然宣布「分」訊，指與李泳豪有共識分手，但堅拒透露原因。李泳豪即晚在電視城開工，更失控嚎哭。◎死撐新歡非吳帥事隔一天，有傳女方一腳踏兩船， 還珠胎暗結，李家鼎表示兒子泳豪得知此事，喊咗成個禮拜。至於楊思琦則回應：「邊度聽番嚟㗎！」而有指思琦新歡是其舊同學Andy（吳帥），她則擘大眼講大話， 硬撐：「總之唔係佢。」
◎企圖混淆分手時間7月初，楊思琦在《東張西望》哭訴，暗示李泳豪未能照顧她，又指4月已與李分手，5月才與吳帥拍拖。不過隨即被踢爆楊在5月17日仍以女友身份出席李泳豪生日派對，明顯楊思琦未能贏得觀眾同情。◎否認請假待產同月有指楊思琦向樂易玲請假待產，思琦又講大話：「我冇同公司請假，只係近排多咗返大陸做嘢！」事實上她9月拍罷《寵愛有家》後，即到美國匿埋，最快要明年3月才返港。 ####
楊思琦入行十年，建立親民和乖乖女形象，估唔到為了一個吳帥，令自己形象破產，最後更要無奈避走美國等生仔。
最近有周刊拍得腹大便便但面容憔悴的楊思琦在美國投靠其胞兄，鬼祟待產。
最初外傳為富商的吳帥，被指空心老倌，與思琦拍拖期間，被拍下出入女方清水灣半島寓所，又坐女友座駕，相當疏乎。圖片
思琦在港一直居於將軍澳清水清半島，自9月起已傳出她秘密搬竇，甚至赴美待產的消息。
李泳豪與李雨陽對劇本期間，李泳豪一直木無表情，看來失蹤一排的思琦再出現，確實搞擾了他的情緒。
之後李雨陽更捉住李泳豪到餐廳傾偈，事後李雨陽說：「佢都好似冇乜事吖，頭先佢冇提起過件事！」
開工完畢，李泳豪隨即乘車搵李家鼎，未知他是否向老竇傾訴心中鬱結呢？
楊思琦為新歡不惜做大話妹，當時李泳豪母親施明及胞兄李泳漢亦連番插爆思琦。
5月齊過生日
今年5月，楊思琦仍以女友身份為李泳豪慶祝31歲生日，當時李家鼎亦在場。不過被傳媒踢爆她搭上吳帥後，楊竟辯稱與李在4月已分手。《蘋果日報》圖片
被撇崩潰
在事先冇共識之下被思琦狠撇，李泳豪即晚在電視城忍不住淚流披面，幾近崩潰。
以喊挽形象
7月，思琦在《東張西望》哭訴，企圖混淆分手時間，亦藉此挽形象，惟事後被李家狂轟講大話。
楊思琦搭上冇水吳帥，惟有靠自己，早幾個月她除了作產前最後努力狂賺之外，還積極睇樓，希望炒樓搵多筆。8月，她被拍下與母親到九龍城睇樓齡六年的博林軒單位（右圖）。當時已有約3個月身孕的她，刻意着鬆身衫遮掩。《蘋果日報》圖片
《蘋果日報》圖片
8月中，楊思琦為免搶去胎兒營養而剪短留了多年的長髮，她更頻頻登台接騷搵錢，這天她不惜赴肇慶出席樓盤活動，賺取六位數字酬勞。
楊思琦9月拍罷有份主持的《寵愛有家》便開始潛水，原來已靜悄悄飛往美國。
有指吳帥父親在內地經營礦務生意，是上市公司主席，但其後吳帥被踢爆只是打工仔一名，家住石硤尾公屋，近年轉做貿易生意，在港並無物業。圖片
857期
