娛一叮
商天娥拍《結•分@謊情式》時，因犯下四宗罪；遲到、黑面、發脾氣及搶戲份，被起了個臭朵「黑天鵝」。據知黑天鵝之所以可以橫行無忌，全因她與監製關永忠私交甚篤，其他演員雖然不值其所為，但敢怒不敢言。劇中演娥姐老公的張兆輝與演老爺的胡楓，因為經常要呆等她埋位而有微言。有次娥姐更變本加厲，遲足兩小時才慢條斯理現身，向來好脾氣的修哥（胡楓），終按捺不住，忍唔住發火寸了句︰「娥姐好有地位，個個都要聽佢話！」
《結》劇開拍三個月，娥姐周圍辣火頭，曾因遲到與張兆輝不和，又硬搶滕麗名戲份。佢對前輩一樣冇面俾，不但頻頻向劇中阿媽雪妮發老脾，更要修哥硬食西北風，多次呆等佢埋位。
監製下封口令
早前有報章大爆娥姐惡行，報道出街後，監製關永忠即出面擺平，更暗中下令，叫各演員封嘴，實行大事化小。知情者話︰「隻黑天鵝恃住有監製撐腰，不但例遲，仲聲大夾惡，台前幕後個個都怕咗佢。之前曼娜姐搞生日P，唔少演員都話如果隻黑天鵝到，就咪預自己，所以最後曼娜姐都冇嗌佢囉。」劇中飾演娥姐老爺嘅修哥，圈中出名好脾氣，但眼見娥姐如此囂張，一早已經睇唔過眼，加上動輒等她成粒鐘，修哥早前拍攝外景戲時，終於忍唔住扯火寸爆。「嗰日娥姐又遲咗兩粒鐘，成班演員等到發吽哣。通告是開07（早上7時開工），11點要交場，娥姐09至到，仲一副漫不經心嘅樣，連道歉都冇句，修哥終於忍唔住騎騎笑咁寸爆話：『娥姐好有地位㗎，你哋要尊重佢，個個都要聽佢話。嗱！依家我哋可以開工嘞！』「娥姐被修哥笑住寸，即時黑曬面，其他人就好心涼囉！始終修哥呢啲老行尊出聲，娥姐都冇佢辦法。」知情者話。被插遲到，娥姐一臉無辜解釋︰「我遲咗半個鐘，係個小誤會。之前我每日都車老公返工，可能會遲少少。我老公都叫我唔好做，問我係咪做得好得滯，惹人妒忌㖭。」
工作人員透露︰「雪妮姐俾娥姐恰得最慘，老人家記對白始終差啲，有時雪妮姐句對白講慢咗，娥姐即時會黑曬口面，仲會講說話俾對方聽：『我趕住收工㗎！』」據知受盡烏氣的雪妮，更一度不想與商天娥合作，寧願向監製提出改劇本「尋死」。求證雪妮，她雖否認，但仍露了口風︰「冇呢啲事！（係咪套劇對白太多，有人俾面色你睇，甚至俾說話你聽，所以你同監製講話唔拍，寫你死咗仲好，反正一年你都係做40個騷啫？）吓……咁犀利嘅，你收到咁多呢啲嘢嘅……我唔評論喇！」12月27日，《結．分@謊情式》演員返無綫拍廠景。娥姐通告上午9時30分化妝，10點45分入廠，一眾演員準時入曬廠，她11時01分才出現，遲到情況有改善。記者上前問回應，她卻十分避忌，入廠前更無厘頭寸記者︰「有塊豬皮行嚟行去，好似做騷咁。」
陳曼娜：有聽過佢遲到同劇的陳曼娜，對於商天娥被指屢次遲大到。她意有所指說：「我同佢對手戲唔多，感覺唔係咁大，你哋不如去問胡楓同張兆輝啦！ 佢哋感受應該大過我好多。」問到娥姐遲大到犯眾憎一事，陳曼娜說：「我係有聽過佢遲到，係有人犯眾憎啩！」
張兆輝：經我鞭策好咗啦！張兆輝人老精，笑說：「依家開始好㗎嘞，我哋以和為貴呀！其實我覺得咁大個人應該知道做乜㗎啦。姑勿論你係乜大人物，點都要有職業道德同職業操守，不過經我鞭策下已經好咗啦！」問到張兆輝點鞭策，他答得更妙：「我拍呢個劇經常開頭場、收尾場，即係最遲收工嗰個，我咪盡快換好衫梳好頭，讀好劇本，然後喺度等囉。其他唔到我控制嘅嘢，冇辦法㗎，希望好好哋拍完呢個劇，依家都拍到八十集，三月左右就拍完嘞！」
雪妮︰耐唔耐都要等
監製下封口令後，眾演員個個收聲，問雪妮姐娥姐奉旨遲到一事，她扯開話題︰「吓！我喺TVB十四年，耐唔耐都要等，邊一組都有㗎！（拍呢套劇係咪好大壓力？）咁拍個個劇都有壓力啦！（咁你仲會唔會繼續拍落去？）會，梗係會，唔會有嘢嘅！」
修哥玩嘢回應
而傍晚返無綫的修哥，被問到是否寸娥姐時，他煞有介事，十分搞鬼話︰「嗱！聽住呀，三個絕對呀！絕對、絕對、絕對冇！另外一樣嘢，佢（娥姐）有冇遲到，我絕對、絕對唔覺。（據聞張兆輝一肚氣，曾向監製投訴？）梗係啦，呢啲劇情嚟㗎嘛。（試過等兩個鐘？）嘩……邊個等咁耐呀？（你呀！）吓！係咩！有人咁講咩！（咁即係個個都準時？）絕對、絕對、絕對冇呢件事。唉吔……唔係，應該係個個準時至啱。」
記者致電監製關永忠時，他說：「冇遲喇！冇事！大家都好好。」監製出口護娥姐，唔怪得娥姐可以肆無忌憚啦！
得罪人多
商天娥性格火爆兼躁底，多年來合作過的藝人都傳過同她有牙齒印，人緣甚差，不過她自己就以：「聲大大並不等於心地壞」來辯護。與葉童面左左2007年拍《師奶兵團》時，同劇的葉童帶私人菲傭服侍拍劇，又經常遲到兼呻辛苦。有次娥姐與葉童服裝撞色，葉童不滿，娥姐話：「乜你有問題咩？」之後她與娥姐被傳經常面左左，不時互相單打。
眼紅鄧萃雯2008年拍《巾幗梟雄》時，有傳她因為不滿雯女比自己戲份多而眼紅，故經常缺席宣傳活動以示不滿，即使《巾》劇收視大收，她連慶功宴亦不去，嶽華更爆娥姐口不擇言。
同宣萱吵大鑊2009年娥姐拍《掌上明珠》時，傳因視為翻身之作，變得緊張火爆，同劇的宣萱看不過眼，經常跟她頂嘴，林保怡便爆兩人互當透明，從不同枱食飯。 ####
多次被指難服侍的娥姐，被指犯眾憎時，她辯解自己是「惹人妒忌」，又擺出一副唔憂做姿態，話考慮唔再簽約無綫。問到會否改性格？她說：「唔會，起碼我個人真囉！」我遲到係奉旨嘅！（設計對白）
寸爆反擊監製下令各演員封口，但受娥姐唔少氣的修哥忍唔住玩嘢，笑騎騎寸爆對方恃高層撐腰橫行：「娥姐好有地位㗎！」
互當透明12月22日，修哥與娥姐齊齊出席《結•分》的宣傳活動。席間，修哥與眾人有講有笑，連陳奐仁都同佢friend過打band，唯獨與娥姐零交流。
得罪全世界的娥姐，當日影合照時，刻意與湯盈盈攬頭攬頸，擺明冷落因爭戲份而結怨的滕麗名，搞到佢勁尷尬。
兩度迴避記者是非纏身的娥姐，27日（上圖）返廠拍攝時愈叫愈走，翌日記者再上前訪問，她不但迴避鏡頭，更擺明車馬話：「你唔好問我嗰啲嘢，我唔回應㗎嘞！我要趕住入廠。」說罷轉身離去。
問到係咪有人遲到，滕麗名扮懵話︰「我唔知喎，放完聖誕今日先開工咋！（娥姐係咪同監製講，要刪你啲對白呀）吓！咁好笑，真係你講先知咋！」
857期
