外來語
「蜘蛛女」姬絲汀登絲新作《世紀末婚禮》大獲好評，演技備受激賞之餘，仲成功於康城影展封後。點知「美國演員工會大獎」（SAG）唔俾面，慘到一個提名都冇。「金球獎」亦跟風，唔侵姬絲汀玩。好彩，世界唔止一個頒獎禮。你唔受我玩，我咪同奧斯卡玩囉。假定奧斯卡都入唔到圍，姬絲汀未來至少有5部電影揸手。畢竟人生求財唔求氣。望吓自己就係最佳例證。
姬絲汀登絲（Kirsten Dunst）最為人熟知嘅，就係飾演「蜘蛛俠」女友。一日「蜘蛛女」終身「蜘蛛女」，花瓶形象注定跟一世。其實姬絲汀唔止咁小兒科嘅。自小童星出身，細細個就跟湯告魯斯（Tom Cruise）、畢彼特（Brad Pitt）合作《吸血迷情》。演技不能夠話冇，係衰在唔識揀劇本。早年嘅《啦啦小野貓》、《叛逆最美麗》，徘徊爛戲與唔爛戲之間。其後疊埋心水銳意洗底，拍過《下一站……伊莉莎白鎮》、《瑪麗皇後》，可惜都係慘淡收場。
導演親身經歷
沉寂一排，最終時來運到俾姬絲汀搵到伯樂，仲拍埋代表作《世紀末婚禮》（香港1月5日上映）。電影主要講兩姊妹對於末日嘅心路歷程。阿妹姬絲汀結婚前嚴重抑鬱，食飯沖涼都冇能力，完全靠家姐照顧。點知行星撞埋地球度，阿妹竟然定過抬油，仲勸家姐快啲接受現實，攬住一齊死，溫馨啲喎。睇到呢個地步，係咪成頭問號呢？我都係。不過電影某程度係真人真事改編。原來導演拉茲馮特艾爾（Lars von Trier）亦曾患抑鬱。據佢經驗所得，抑鬱症患者平日雖然鬼咁愁，但一遇到重大問題，患者通常比正常人更加老定。而姬絲汀一角，基本上就係導演嘅親身寫照。
影評激讚
有導演「照住」，梗係事半功倍，雖然電影票房成績唔算彪炳，但姬絲汀嘅演出就獲得一致讚賞。有影評表示，齋睇姬絲汀演出已經值回票價，更睇好對方攞影後。不過影評鍾意又並不代表評審鍾意。早於康城影展，姬絲汀率先封後，氣勢本來如虹，但係踏入1月頒獎禮季節，姬絲汀完全敗陣，喺奧斯卡指標SAG頒獎禮，以至金球獎均未有提名。究竟係運滯定技術性擊倒？真係一個謎。不過姬絲汀都只係30歲啫，大把機會封後。如果2012不是末日的話。
新年的文化
《世紀末婚禮》雖然有災難片成份，但劇情以靜態為主。新年唔想做文藝青年，仲有大把好選擇。
我的華麗皮囊
西班牙大導演艾慕杜華最新力作，講變態整形醫生將強姦女兒嘅兇徒，變成亡妻嘅容貌。愛恨交纏又香艷，係成年人之選。上映日期：12月29日
緣滿除夕夜
繼《緣滿情人節》之後，又再以大堆頭明星、小故事形式冧觀眾。劇情可想而知單薄，但題材應節，而且有羅拔迪尼路、艾斯頓古查等明星客串，夠曬人氣。上映日期：1月5日
龍紋身的女孩
原著同名小說世界知名，如今拍成電影，應該有唔少小說粉絲捧場。加上由大衞芬查執導，水準一定有保證。上映日期：1月5日 ####
30歲嘅姬絲汀7歲入行，1994年跟湯佬、畢佬合拍《吸血迷情》，贏得唔少女配角獎。不過自此之後無甚佳作，今年2011封後，算係豐收年。
姬絲汀2011年4月憑《世紀末婚禮》封康城影後，可惜於SAG、金球獎都未有提名，依家就等1月24日奧斯卡公布提名名單，睇吓姬絲汀榜上有冇名。
妹妹抑鬱，做家姐嘅就隨身照顧。飾演家姐嘅係《生命可以有多重》嘅Charlotte Gainsbourg，唔出名但演技唔錯。
電影得電視圈兩大猛男演出，一個係人氣劇集《真愛如血》型仔殭屍Alexander Skarsgard（中），佢飾演姬絲汀丈夫；另一個係《24》嘅Kiefer Sutherland（右），飾演姐夫一角。
行星Melancholia將要撞向地球，家姐極度徬徨，患抑鬱嘅姬絲汀反而出奇平靜，掉番轉頭安撫家姐、姨甥仔。
劇情雖然講行星撞地球，但主要探討人類對末日嘅心態，呢類手指出煙鏡頭，算係特技㗎啦。
太陽、月亮同Melancholia行星同時於天空上出現，三個主角認為末日將至，竟然着靚靚企喺花園迎接死亡。
導演拉茲馮特艾爾（紅衫）曾患抑鬱，從治療中得到靈感，編寫《世紀末婚禮》嘅劇本。
姬絲汀喺電影露過胸，今次為電影更全裸上陣，被讚身材靚。
啱大人
夠應節
有人氣
857期
