博出位
聖誕節普天同慶，又係送禮嘅好日子，無論送禮物或者收禮物一樣咁開心。眾星準時喺12月26日boxing day拆禮物，更即時post上新浪、騰訊微博，同大家分享。要選最有心思嘅禮物，莫過於千嬅親手織咗兩個幾月嘅溫暖牌冷頸巾，不過可能大肚婆特別多嘢諗，淨係諗BB出世咩樣都可以諗一日，所以條頸巾仲未起貨。老公丁子高即時喺微博暗寸老婆：「呢條仲係一條洗面毛巾。」都係丁生心思細密得多，送上子母鎖匙鑽飾，寓意屋企將添新成員。送禮都不忘腹中BB，真係絕世好爸。
丁生詐型
今年係丁太同丁生最後一個二人世界聖誕節，千嬅成功有喜，丁生買了一大一細鎖匙鑽飾俾老婆，真係好有意思。佢仲附上一張親手寫嘅聖誕卡，千嬅拆禮物時肯定冧爆。而10月開始織溫暖牌頸巾俾老公嘅千嬅，聖誕節都未起貨，仲俾丁生公開詐型。睇嚟千嬅安胎之餘都要勤力啲，希望丁生新年有溫暖牌頸巾用啦！
容祖兒收厚禮
剛剛喺廣州飛返香港過節嘅容祖兒都算收穫豐富，除咗有好友送頸巾之外，最勁係收到Chanel送嘅特別限量版手袋仔，個袋最少值3萬，真係恨死人！祖兒亦好識做，攰到雙眼紅曬都笑曬影相post上網，幫人賣吓廣告都要啦！
山聰收聖誕BEAR
陳山聰同何超雲呢pair，呢頭去完英國過節，嗰頭返香港繼續癡纏。山聰幾十歲男人老狗攬住隻聖誕熊bear bear，話好多謝超雲。超雲回應話已經拆咗禮物，不過冇講收到咩。佢兩個肉麻當有趣，真係睇到眼寃。
蔡少芬偷步拆禮物
身在橫店拍劇嘅蔡少芬，平安夜收到禮物就即拆，完全唔跟boxing day拆禮物嘅規矩。佢收到扮相機嘅iPhone套，真係幾得意，唔怪得佢忍唔住即拆即用。老婆北上拍劇，老公張晉好似未有咩表示喎，係咪代妻湊女太忙呀！
Sammi最愛收金句
Sammi除咗有安仔送禮物，仲有一班忠實fans，今年佢收到好多禮物，有實用嘅羽絨褸、冷衫同埋化妝品，不過佢最鍾意嘅一樣竟然係金句擺設，信主得救嘅Sammi，都係着重心靈滿足。
陳敏之搶城城tee當禮
陳敏之平安夜同好友黎諾懿一齊去睇郭富城演唱會，仲搶贏兩萬觀眾成功拎到「城城tee」，敏之即時post上微博話呢份係最好嘅聖誕禮物。原來得到自己努力搶番嚟嘅聖誕禮物，會特別開心。
舒淇大豐收
舒淇今年聖誕節收禮物收到手軟，每收到一樣禮物都會上載微博公開多謝送禮人，而且禮物種類都幾多，有格仔圍巾、太陽眼鏡，仲有名貴鋼筆。收咁多禮，當中肯定有追求者送㗎啦！聲稱名花未有主嘅舒淇，唔知揀啱未呢？ ####
丁太收鎖匙吊墜
丁生收超短頸巾
限量手袋
聖誕熊
相機造型iPhone套
金句擺設
城城T恤
格仔圍巾
太陽眼鏡名牌鋼筆
857期
