媽咪姐手帳
每到聖誕新年，媽咪姐例必買買買同食食食，但一班名人過節呢？梗係忙好多啦！要去豪門婚宴，又要去吓Ball咁， 一日可能仲要連趕幾場，真係諗吓着乜衫，都已經要食番粒必理痛。望真啲，佢哋個個都有啲嘢㗎！好鬼funny。
梁振英 玩怕醜
禮拜一（26日），前商務及經濟發展局局長馬時亨愛女馬露明喺君悅舉行婚宴，特首參選人梁振英夫婦一到場見記者影相，好似成碌木咁硬曬軚，手仔都唔識拖。比起曾經有「感情缺失」嘅唐英年，每次同老婆出動都曬恩愛，今次輸曬喎！
鄭裕彤 繼續潮
鄭裕彤去君悅慶祝聖誕節來臨，當晚以西裝襯波鞋嘅佢，一身「潮Look」。咪以為彤叔依家先追上潮流，以往無論各大小場合，佢都會以呢個招牌Look見人，好似早輪佢出席旗下嘅周大福投資者推介會都一樣㗎！
雷林靜怡 搞形象
依家甚少去Ball嘅九巴家族後人雷兆光太太雷林靜怡，一出動梗要扮到行！除咗自己要夠sharp，囡囡亦要襯過先得。喺平安夜嘅早一個禮拜，雷太就帶住囡囡去銅鑼灣shopping，掃咗唔少紅色裙仔。難怪囡囡喺君悅慶祝平安夜時，sharp盡全場啦！
李民橋伉儷 左右手
聖誕節假期，東亞銀行副行政總裁李民橋同太太Bonnie頻頻出動，喺平安夜同禮拜一（26日），連去兩個喜宴。見Bonnie兩日都悉心打扮，襯過曬先出動，唔同手袋唔同裙。唯一相同嘅，就係手上嘅鑽石鏈！不過佢好醒目咁由左手轉去右手㗎。 ####
《蘋果日報》圖片
《蘋果日報》圖片
857期
