同你吟一吟
一連七場「Leon× U紅館演唱會 2011」，星期日（十二月十一日）尾場，撞正Leon 四十五歲生日，黎太樂基兒終於肯現身，坐响嘉賓席睇老公演出，同場仲有李嘉欣帶埋許晉亨一齊捧場。
新歡舊愛列席，許生許太睇得投入，偏偏樂基兒成晚托住個頭，雙眼唔知望去邊，對老公上世紀嘅經典歌完全冇feel。又難怪，為咗幫老公穀飛，先傳婚變，再傳懷龍B，交足幾個月戲，勞心勞力！點都好，Leon演出明顯落力，飛撲同fans握手，頭貼頭影合照有求必應，尾場嘉賓仲請嚟大肚Kelly，觀眾反應奇佳，Kelly更無懼動胎氣，同Mark雷唱完《紀念日》，再扭腰獨唱《花花宇宙》。Leon話，開聲請Kelly做嘉賓第二日先知佢有咗「蝦餃仔」細佬「小籠包」，至於幾時到佢生龍B？Leon又有金句：「冇（BB），真係冇，絕對冇，肯定冇（有冇計劃？）好多謝媽咪，好多謝爸爸，你哋各位（指記者）都係我爸爸媽媽，我爸爸媽媽都冇問過我生仔，你哋就不停催生！」我投降！ ####
開騷頭暈暈尾場終於現身，樂基兒入場時表現生猛，但開騷冇耐已經走曬樣，成晚托住個頭聽歌。
入場醒神
尾場演出Leon出盡全力，一邊跑一邊握手，仲趴入觀眾席同fans頭貼頭影合照，真係好耐都冇見過黎天王咁熱情！
尾場嘉賓請嚟龍B媽Kelly，佗住五個月「小籠包」，又唱又扭腰，非常賣力。
許生許太俾面撐場，之後仲入後台兩啤人影合照，樂基兒高人一等，個肚又扁，果然未有B。
尾場當晚正正係Leon 四十五歲牛一，完騷後公司為佢準備生日蛋糕，老闆林建嶽更向壽星送上擁抱。
1136期
