媽咪姐手帳
微博除咗係宣傳嘅好幫手，仲可以用嚟曬呢樣嗰樣？好似上個月尾，賭王何鴻燊入院過90大壽，三、四房輪住同佢慶祝之後，都喺微博發功。先係四房超盈曬四太坐賭王大髀，鬼咁火辣；跟住三房超蓮又曬三太同賭王玩波波，夠曬肉麻。今個月初，三房何猷啟都加入戰團，新開咗個微博，除咗報告自己嘅行蹤，仲放埋三太教佢織冷衫嘅相，仲唔覺意咁搵賭王老竇做相嘅背景。咁樣話俾人知三房同老竇關係有幾好，認真高招喎！
####
賭王客串猷啟學三太織冷衫，猛話好難，仲將有賭王做背景嘅相放上微博，唔知有心定冇意呢！
喺英國讀書嘅猷啟，不時報告自己嘅行蹤，又放埋自拍大頭相，同兩個家姐有得揮。
猷啟鍾意群男仔堆踢波，相信佢喺香港嘅四眼女友放心曬。
為咗慶祝自己熱捧嘅球隊贏波，猷啟放張咀波衫嘅相上微博，下身只係着條孖煙囪，連妹妹超蓮都忍唔住要留言。鬼馬嘞你！
855期
