外來語
2011年話咁快就完，係時候埋單計數。今年市道普通，連帶電影票房都表現一般。做老闆嘅無他嘅，唔望你賺都唔想你蝕。偏偏事與願違。諗住請得鬱妮歌潔曼、尼古拉斯基治呢類A級明星，應該好有號召力。點知觀眾一句唔buy，票房咁就跌落穀底。除咗令老闆蝕錢，最無奈仲要孭住「票房毒藥」呢個稱號。2011毒後毒王，我哋有請。
早於11月，福布斯就公布2011年片酬過高嘅演員排行榜（詳見附表）。話得片酬過高，即係人工多多、貢獻少少，曲線踩你物非所值。咁究竟邊個咁唔襟撈？登登登櫈，由《E.T.》童星出身、祖芭莉摩亞（Drew Barrymore）奪冠。據資料顯示，芭姐每一蚊美金片酬，只係賺4毫子美金。風險高，回報率低，邊有人敢再投資落佢度吖。事情本來都已成定案。不過剛剛有網站進行調查， 選出2011年最蝕錢電影。排名榜上，芭姐竟然「落第」，反而影帝尼古拉斯基治（Nicolas Cage）、影後妮歌潔曼（Nicole Kidman）憑《不忠之劫》順利入圍。其實早前嘅片酬過高榜，兩人已經榜上有名，如今作品再被選為蝕錢之作， 仲有咩好講吖？一字記之曰：毒。
蝕中之霸
Mars Needs Moms動畫向來深受家庭觀眾歡迎。假使一套動畫連細路都呃唔到入場，可以好肯定，呢套動畫一定有問題。好似《Mars Needs Moms》咁，1億5千萬製作，但全球票房只得4千萬雞碎咁多。你話超新科技勁過《阿凡達》；又或者大明星配音嘅，蝕錢都無話可說。至弊兩者都冇， 嗰1億5千萬使咗去邊？真係一個謎。再者，監製羅拔湛米基斯（Robert Zemeckis）一路有鋪蝕錢癮，前作《北極快車》、《魔戰王：貝奧武夫》同樣票房失利。電影公司仲肯掉錢入鹹水海，莫非真係錢多到使唔曬？
影後無用
Your Highness唔係明星多就等於好票房。《Your Highness》有奧斯卡影後妮妲莉寶雯（Natalie Portman）做女主角，仲有影壇新一代實力派占士法蘭高（James Franco），理應OK。不過演技並不能彌補劇情空洞。口碑差自然冇人入場睇啦。
猛男失威
米路吉遜 繼續鹹魚米路吉遜（Mel Gibson）自從家暴虐妻曝光之後，人氣由穀底跌至深淵。老友茱迪科士打（Jodie Foster）諗住開套《愛在手狸》俾佢鹹魚翻生，點知票房失利。猶幸口碑尚算OK，咪當輸陣唔輸人囉。
金球影帝 未紅先黴但凡影帝、影後出爐，必然人氣急升，帶挈得獎作品票房造好。無奈保羅哲阿馬田（Paul Giamatti）不但冇紅，其作品《Barney’s Version》表現亦差強人意，頭幾星期連50萬票房都冇，認真陰功。
300戰男 戲名累事一套戲賣唔賣得，除咗睇卡士、劇本，仲有好多因素。《300戰狼》肌男謝勒畢特（Gerard Butler）本來甚有觀眾緣，不過作品《Machine Gun Preacher》就仆到直一直。原因？分析話係戲名老土喎。「一個揸住機關槍嘅傳道人」喎，的確好難令人有意欲睇。
2011吸金王
講完「敗家仔」、「敗家女」， 當然要講下邊個明星最生性。福布斯早兩日公布「2011最賺錢明星」， 第一位姫絲頓史釗域（Kristen Stewart）。佢憑《吸血新世紀》而成名，整個系列累計票房高達24億美金， 成績驕人。佢男友羅拔柏迪臣（Robert Pattinson）雖然有份主演《吸血》系列， 但前作《驚動了愛情》、《情約奇藝坊》票房普通， 間接拖低回報率， 排名只得第三。至於第二位， 由安妮夏菲維（Anne Hathaway）奪得。佢主演嘅《愛麗絲夢遊仙境》票房狂收10億， 《新娘愛鬥大》、《愛情戀上癮》均成績唔錯， 下一年《蝙蝠俠3》上埋映的話， 有望打敗姬絲頓，成為2012嘅吸金女王。 ####
《不忠之劫》早前喺香港上映，票房油麻地。不過點都好過美國。開畫10日就被迫落畫，票房慘到3萬美金都冇。嗚嗚嗚， 我哋要長跪不起謝罪！（設計對白）
福布斯2011片酬過高明星
2011毒片排行榜
妮歌潔曼前作《愛情大龍鳳》票房唔錯。咁梗係啦，有亞當桑迪拿又有珍妮花安妮斯頓， 何況妮歌只係客串一角， 唔算有功勞。
《不忠之劫》蝕錢蝕入肉，尼古拉斯基治另一套作品《Drive Angry》亦入圍，一炮雙響。
福布斯2011最賺錢10大明星
855期
