各懷異心句句有骨福祿壽面和心不和

搵錢無辦法各懷異心句句有骨福祿壽面和心不和

扮嘢福祿壽（王祖藍、李思捷、阮兆祥）於2月4日首度踩入紅館舉行一場《那些年，爆笑不離3兄弟》演唱會，以往在台上，三人一條心，齊齊扮鬼扮馬又唱又跳，原來鏡頭外有鮮為人知的另一面。日前，三人奉命宣傳，到教室學整餅時已率先上演一幕貌合神離的單打場口，有人不滿曾開糖水舖的祖藍「扮大佬」，還用其執笠甜品店做話題出言譏諷：「識整間舖頭就唔使執笠啦！」句句有骨兼插到入血，三人Friend極有限囉。採訪：方騫平　攝影：袁東亮

場地提供：糕季烘焙材料專門店Tel：28132148

福祿壽扮嘢功夫一流，在演唱會中，三人會出盡奶力破紀錄，扮足十五個藝人，難度更上一層樓，包括阮兆祥扮盧廣仲彈結他；李思捷會學友上身跟湯寶如大唱經典冧歌《相思風雨中》；而祖藍除扮「涼朝偉」外，更跟劉子千合唱一曲《唸你》務求笑爆觀眾為止。殊不知，三人原來連鏡頭後同樣扮緊嘢！「佢哋唔妥咗好耐㗎啦，講扮嘢，始終祥仔係前輩，但近年王祖藍就出曬位，拍戲、唱歌、主持、連追女仔都瓣瓣掂，前年仲開埋演嘢會，收入比佢哋多好多，福祿壽好似由佢掛頭牌咁，祥仔梗係唔like啦！至於有錢仔李思捷愛扮大佬，當然我行我素，唔睇祖藍台戲。不過，始終福祿壽成功入到屋，仲係無綫節目收視福將，受到公司力捧，大有錢途，點唔妥都要頂住。」知情者爆料說。

祥仔揭人瘡疤

當日，Cool到爆的思捷和祖藍貌合神離，夾響中間的「口水佬」阮兆祥索性玩手機，各自各精采。至開始為做餅選材時，祖藍用前甜品店老闆的口脗指揮大局，限制兩人選用的材料，正所謂你有你講，兩人面黑黑未有理會，仲夾到拿拿聲轉身離開，留下祖藍繼續搵料，極為無癮。祥仔條氣未順，忍唔住帶笑喪窒祖藍：「你識咩？咁叻間甜品舖就唔會執啦！」EQ高的祖藍馬上扁嘴：「真係提起我傷心事，等同跟女友分手！我依家冇咗一棟樓嘅首期呀。」祥仔未有停口，還伸多兩腳：「算啦，幾千萬啫，你一個活動都（搵）番嚟啦。」在旁的李思捷則陰陰嘴笑。

祖藍成箭靶

祖藍被勾起傷心事，即自揭瘡疤：「其實最初係跟趙雪英等合資糖水店攞經驗，但最後各有各忙都冇時間打理，唯有易手，點知接手嘅都唔再玩！一直有心願，想喺演唱會上送糖水慰勞台前幕後，唉！爭嗰幾個月時間啫，捱唔到就係捱唔到，好遺憾。」祥仔竟落井下石哈哈笑說：「唔緊要，下次喺紅磡殯儀館都一樣嘅啫，到你死時會加送多一堂齋（法事）！」

祖藍以「皮笑肉不笑」的笑容作回應，一切盡在不言中。他續說：「唯一慶幸可以收番由劉德華題字嘅牌匾，但都同華仔講聲唔好意思。」傳祖藍好事近，當問到三人會唔會喺演唱會上宣佈婚訊？祖藍得戚咁話：「我會宣佈結婚，但唔知幾時！」祥仔就仲未窒夠：「有冇睇過離婚演唱會？」面和心不和「真人騷」最後在嘻哈大笑中落幕。

鏡頭前融洽

鏡頭後分化