未來奶奶壽宴確認新抱地位 胡杏兒嫁硬黃宗澤

32歲胡杏兒與 31歲黃宗澤（ Bosco）拍拖七年愛得甜蜜，前晚 Bosco母親擺 60大壽，杏兒不但抽空到賀，更以準新抱身份坐主家席，看來杏兒與 Bosco快將好事近。

胡杏兒上月攞視後時向黃宗澤發表「難頂」愛的宣言，由於她早年曾揚言 30歲之後及攞完視後後才考慮結婚，而龍年又是雙春兼閏月，天時地利人和樣樣齊，深信拍拖七年的杏兒與 Bosco也將好事近，趁七年之癢拉埋天窗！

事實上，杏兒與 Bosco不但早年已經見家長，且雙方每有家庭喜慶活動，另一半總以家人身份出席，如前晚 Bosco母親擺大壽，杏兒也以準新抱身到賀。

黃宗澤前晚為 60歲生日的母親（左）擺大壽，主人家逗留至近淩晨 12時才離開。

黃媽媽手上的鮮花估計是準新抱杏兒所送。

黃媽媽前晚慶祝 60歲生日及榮休之喜在君怡酒店設宴。

得黃母微微笑

本報接獲讀者報料，指杏兒與 Bosco前晚在尖沙嘴君怡酒店食飯見家長。記者接報後到酒店等候，果然見杏兒於晚上 8時許與 Bosco無綫經理人 Hillman一同抵達。不過，原來杏兒與 Bosco並非相約雙方家長飯敍，而是特地賀未來奶奶生日。就記者所見， Bosco為母親在酒店中菜廳設宴擺壽宴，筵開 10席，門外寫上「李佩芬女士生日宴會」及「 Happy birthday to Vanessa」，並貼上一張座位表，清楚見到杏兒獲安排坐在 Bosco與黃媽媽的主家席。

至晚上 10時半親友陸續離開後一小時，身為半個主人家的杏兒才單拖離開。記者問到與 Bosco食飯所為何事時，她笑說：「冇呀， Bosco媽咪生日吖嘛。」是否見家長？杏兒笑一笑未有回應。問買甚麼禮物送給未來奶奶？她謂：「冇乜特別。」黃媽媽在壽宴上是否很開心？她說：「開心。」說罷便一支箭離開。大約 15分鐘後，飲到面紅紅的 Bosco搭著黃媽媽膊頭與經理人及數名親友離開，黃媽媽手上捧住大束鮮花，笑容滿面。問到杏兒送她甚麼生日禮物以及是否很開心時，黃媽媽全程笑而不答，偕 Bosco登上座駕離開。

記者昨日致電杏兒，問送了甚麼生日禮物給未來奶奶時，她說:「送咗紮花，女人鍾意收花，同埋 auntie唔講物質嘅嘢。」黃媽媽有否催婚？杏兒說：「冇呀，因為噚晚係 auntie 60大壽同榮休，好多 auntie喺度，冇講呢樣嘢。」至於黃媽媽職業，她笑言由 Bosco回答好了。

杏兒（箭嘴示）與黃宗澤一起坐主家席，黃家媳婦地位穩如泰山。

昨日連趕三場的胡杏兒，在馬鞍山出席活動時大派財神。

日踩三場人氣旺

胡杏兒百忙中抽空為未來奶奶賀壽，這個準新抱相當識做。

杏兒自攞完視後後工作不斷，前晚出席完未來奶奶壽宴的她，昨日便要連踩三個活動，先於早上 8時許參與百萬行活動，下午 2時踩入馬鞍山出席活動銀，至下午 3時半再到鑽石山宣傳《換樂無窮》劇。其中宣傳《換》劇時，訪問時她自言專一，但嫌拍拖時間很少，又否認為鄭嘉穎搭路入 Neway唱片，自嘲沒這能力。

採訪、攝影：龍婉琪、黃文成、黃曉妍

相士話：今年唔結　要等兩年

堪輿學家區仲德接受電話訪問表示，今年農曆 10月至 11月，是胡杏兒和黃宗澤的最佳婚期，如果兩人錯過了今次機會，就要等到 2014年才會出現最佳的結婚時間。區仲德表示二人命格匹配，男方可帶旺女方的財運及事業，女方又會帶旺男方事業，他說：「胡杏兒會有正官運，加上有太陰星照住，冬季會步入夫星最旺嘅時間，到時仲會有粒紅鸞星，農曆 10月、 11月可以出嫁。至於黃宗澤有三台吉星，農曆 10月、 11月有暗財星入命，入佢夫妻宮，呢個時候係結婚最強嘅月份。」