福祿壽初踏紅館 祖藍擺偉仔上台放笑彈

福祿壽三兄弟再次開騷吸金，今次初踏紅館發放笑彈，以近期兩套賣座電影的戲名為主題吸引觀眾。經常反串扮女人的王祖藍一改作風，挑戰型男梁朝偉憂鬱一面，並希望偉仔能捧場。

阮兆祥、王祖藍和李思捷去年與汪明荃開騷大受歡迎，今次飛起汪阿姐，由三兄弟親自孭飛，於下月 4日處女踏足紅館開騷，將搞笑延續大舞台，玩盡四大天王及 90年代的爆紅藝人，締造集體回憶。今次福祿壽專登構思《那些年，爆笑不離 3兄弟》為演唱會主題，明顯用近期兩套賣座電影《那些年，我們一起追的女孩》和《作死不離 3兄弟》的強勢做賣點。

福祿壽將踏紅館開扮嘢騷，三位扮嘢能手在鏡頭前不忘整色整水。

嘉玲見到祖藍扮偉仔後，即留言謂嚇了一跳。資料圖片

祖藍扮「涼朝偉」，確實笑破肚皮。

「個個都話似」

福祿壽三兄弟經過長期磨合，演出已有默契，各人擅於不同演繹，阮兆祥自稱優點是扮靚仔，李思捷則堪稱扮嘢王，王祖藍最為人熟悉是反串扮女人，但今次祖藍會改戲路扮男人，他笑說：「我扮咗朝偉之後轉埋戲路，今次扮佢憂鬱，個個都話似，開心到死，最爆係劉嘉玲睇完會覆我，真係好畀面，到時會叫佢哋嚟開心嚇，朝偉嚟睇就更加好。」與嘉玲私交甚篤的祥仔則表示今次扮朝偉沒有刻意通知他，只知反應良好。

李思捷最叻扮嘢，在紅館騷定必使出渾身解數。

阮兆祥堪稱爛 gag王，可 24時不停說話。

祥仔爛 gag王

祥仔被冠以爛 gag王稱號，他笑說：「我鍾意創作同諗嘢，可以講係全娛樂圈爛 gag王，幾乎 24小時可以不停講嘢。」他又激讚李思捷一旦選定題材，扮嘢細緻程度達 96分，李思捷說：「鵬哥（盧海鵬）教落，扮嘢捉到一兩個神情要誇大十倍去做就得。」今次紅館騷暫定開一場，三子坦言有壓力，若然票房成績好，會考慮加開。