心痛林峯遭圍剿 樂易玲：捍衞勁歌制度

林峯因《 Chok》一曲獲頒《勁歌》金曲金獎而被全城圍插，昨日他和樂易玲一起到電視城出席無綫活動時，林峯坦言不覺得矛頭針對他，希望大家不要放大去看整件事。樂易玲就否認離職傳聞，又力撐愛將林峯的分數名列前茅，她說：「我覺得我哋應該捍衞《勁歌》嘅制度，應該攞嘅人係要畀佢。」

無綫行政主席梁乃鵬昨日聯同製作資源部總監樂易玲、林峯及 28位應屆候選國際中華小姐，在電視城為全新興建的 Sky Zone進行啟用拜神。林峯因歌曲《 Chok》獲頒金曲金獎而被圍插，問他的心情有否好轉，他說：「冇差過，不嬲每一次都會有唔同嘅聲音，呢個係本身個規則。」

 

（左起）樂易玲、梁乃鵬和林峯昨日為 Sky Zone進行啟用拜神儀式，其中樂易玲力撐林峯攞金曲金獎。

林峯不覺得矛頭針對他，並說：「你哋講緊一啲包括藝人嘅回應，我全部都 friend，我自己睇完都笑，大家私底下都熟，無傷大雅，大家唔好太過放大件事去睇，作為同行都知道自己本份係做乜，總之繼續努力。」

近日再傳樂易玲將離開無綫，轉投邵氏掌管電影部，阿峯笑說：「傳咗好多次喇，根本冇呢回事，我都會講笑問佢係咪真㗎，次次都係我哋唔知，淨係外面啲人知。」梁乃鵬也斬釘截鐵表示絕無其事，樂易玲更笑說：「退休唔好計喇，始終有一日我會退休，我暫時都唔會，冇呢個念頭。」

林峯將擔任今屆華姐的表演嘉賓，他大讚華姐真人比照片的質素好。

墨爾本候選華姐 8號馬穎傑（中）低 V一出，頓時把旁邊佳麗比下去。

「佢個分名列前茅」

來自安陽的 21號許敏，在活動上忽然拉低拉鏈曬事業線。

對於阿峯被網民圍剿，問樂易玲會否覺得心痛？她說：「首先我唔覺得呢啲係圍剿，有時我哋都會有諗過，係咪因為佢係無綫 management嘅藝人，就係最蝕底嗰個？冇可能㗎嘛，如果佢外邊個分加埋係名列前茅，我哋音統都改變唔到呢個事實，我覺得我哋應該捍衞《勁歌》嘅制度，應該攞嘅人係要畀佢，唔可以因為怕外邊有唔同嘅聲音，又驚有人圍剿，如果呢啲係愛佢變成害佢，嗰啲都一樣係，咁佢一世咪唔使攞？點解自己 management嘅人要秤低啲呢？」

樂易玲續說：「好似 Eason（陳奕迅）同千嬅，我哋私底下係好朋友，自己人笑自己人係最安全，你笑第二個人哋咪會誤解。」此外，梁乃鵬宣佈預計 2015年將會有一個大型新媒體中心落成，估計投資 10億。