換大屋
一向恨生B嘅37歲楊千嬅，最近有喜2個月，不過37歲佗B已屬高齡產婦，加上第一胎真係分外緊張，為安「龍」胎，千嬅已向公司申請放長假，實行靜休等新生命。
「龍」胎未出世，千嬅已覓定新竇等搬，上週三（7日）更單拖秘密去跑馬地新盤紀雲峰睇樓，翌日即決定豪掟8,600萬買同層兩個單位，據知千嬅打算買嚟打通日後做「龍B」皇宮。兩個單位打通後差唔多成四千呎，千嬅生多幾件都夠住！
楊千嬅同丁子高於09年8月喺拉斯維加斯註冊結婚，上年尾君悅補擺完喜酒後，一直努力接job兼「造人」。結婚兩年一直未有動靜，其間更有傳丁子高因努力「造人」不果而去驗精、亦有指千嬅不時睇中醫同食補品調理，幾番努力丁氏夫婦終於年尾「造人」成功，而千嬅對呢位「龍B」更係大為緊張。
秘密睇樓
雖然上週千嬅疑因剛完成個人演唱會而疲勞過度，導致腹痛入院，但剛出院的她於上週三（7日），竟撇低老公丁子高往跑馬地新樓盤紀雲峰，單獨約相熟地產經紀睇樓。據知闊太千嬅一進內便被單位的馬場景觀吸引，而且紀雲峰屬一梯兩夥單位，私隱度較高，正好啱曬打算專心養胎嘅千嬅，所以隔咗一日千嬅就決定一次過買曬高層嘅相連單位，共3千7百多呎，合共約8,600萬。據知情者透露：「千嬅嗰日單拖嚟睇樓，佢一嚟到就話最冧個馬場景，不過佢話每個單位得千九呎，唔係好夠住，所以咪一次過買曬同層嘅兩個單位打通，聽講發展商只係畀咗2% discount千嬅，千嬅好爽快就撲鎚，似乎真係好鍾意。」不過據知呢次楊千嬅買樓唔只冇預老公睇樓之外，連層樓都冇預老公名，不過龍B在肚，丁生唔會詐型嘅！
超蕸教路
楊千嬅同賭王二房嘅何超蕸老友鬼鬼，呢幾年來，多得老死超蕸教路，令千嬅喺澳門嘅投資進帳不少，成為圈內富婆。
3,800呎皇宮
富婆楊千嬅揀中嘅紀雲峰係跑馬地少有嘅一手樓，位於山光道近最頂位置，大廈無甚遮擋，可廣闊睇曬跑馬地一帶景致，而楊千嬅所購入嘅高層A、B單位，面積合共3,808呎，丁B出世就有新屋住。
過千呎大廳
單邊客廳大約500多呎，假如千嬅將兩個單位打通後，客廳即成千呎巨廳，龍仔點跑都夠位。
700呎套房
原則主人套房約380呎，家陣千嬅打通後，主人房可以有約700幾呎，大過好多人成間屋。
超豪廚房
紀雲峰廚具全部用曬貴嘢，而且面積夠大，阿仔搞生日party都足夠應付。
對正馬場
標準單位廁所有巨型落地窗對正馬場，千嬅一邊沖涼一邊睇夜景，超歎！
護 B鬧爆老細
廣告商係米飯班主，但烈女千嬅一樣敢言冇面畀。事緣上週四（8日），屈臣氏官方在公司微博上公開恭喜千嬅有喜嘅消息，搞到因為「怕小器」，從未公開承認有B嘅千嬅，不惜得罪米飯班主，喺微博上發火回應，叫有關方面要「懂得尊重」，不過雙方言論都隨即被刪除。本刊至截稿前，屈臣氏公關仍未回覆。 ####
好碎料啫 設計對白
呢兩年密密做嘅楊千嬅，開騷又拍戲，原來有原因，搵嚟儲埋做「龍B」基金，真係未出世就已經係「金叵羅」。
千嬅今次豪擲8,600萬買豪宅，由睇樓到落訂都係單拖搞掂，完全唔使驚動老公丁子高，咁大筆數丁生都唔使睇實，真係相信老婆眼光喎！
嘉里建設旗下項目嘅紀雲峰，共126夥，單位以現樓發售，千嬅買後隨時可以入夥。
楊千嬅擔任屈臣氏代言人，相信可能成為產前最後一個廣告。
238期《FACE 週刊》
