社交圈
有名人為了見報露肉、爆料出盡八寶，亦有人為了掩人耳目，不惜走後門左閃右避，總之各懷鬼胎，苦心經營。
何超蓮 抵冷露肉
家姐超雲孖男友陳山聰歐遊，三房二女何超蓮上週五就由英國趕返香港，翌晚做乖乖女陪阿媽陳婉珍出席歡樂滿東華籌款。超蓮仲專登在英國花萬多元港幣買條性感Herve Leger貼身裙出騷，搶盡其他姐仔風頭，「我都唔知入到嚟咁凍。」唔知氣溫，咁知唔知三太煮乜餸籌款呀？超蓮死撐話：「一陣間睇就知啦！」
趙式芝 性感賣袋
手袋A.D.M.J.在圓方開Pop-up Store，身為代理的趙式芝不單低胸出席，仲搵埋密友Sean（左）帶同兩隻約瑟爹利愛犬Bubbles和Beluga做Santa's helpers招呼客人，又開腔回應弟弟趙式浩未婚產子，「細佬想BB低調啲，○歲太早做一個名人，會有負面影響。」弟弟會否和父親一樣不結婚？「Daddy講咩一回事，最緊要佢開心。」
趙式芝在圓方二樓搞酒會，其父趙世曾就和女伴在一樓濕平，問趙世曾係咪去撐女兒場？他扮嘢話：「佢有活動咩？」問身邊幫他拎報紙的靚女（右圖）是誰？趙生尷尬笑而不答，女伴仲即刻彈開，超騎。
徐子淇 識做老婆
做富豪新抱除了打扮得體，仲要喺適當時候扮低調。生了三個孩子的「千億新抱」徐子淇，上週二拖住老公李家誠去公益金活動，一班傳媒追住做訪問，佢話：「遲啦，要入場。」但上週五單拖去藝術中心晚宴時（右圖），就自動波講不停，佢話老公當年借搞西九藝術區，追到去英國，「佢叫我帶佢參觀博物館。」之後又話唔敢驗孕，「唔可以再有，老公都覺得三個已經好嘈。」
薛芷倫 曬V
向來三點不露的薛芷倫，上月被影到晨早八點去中環H&M掃Versace（右圖），上週六她在中環置地文華搞四十八歲生日晚宴，她便穿上金色短裙連頸飾曬戰績，並在十一度低溫下在酒店門外講生日願望，「希望有健康的身體，美麗的內心，快樂的靈魂，三位一體已開心。」她還自動波除低水貂大衣，露肉任影。
邱華瑋 鬼祟避鏡
華光船務主席趙世光女兒趙式明（右圖）出席藝術中心晚宴時，趁傳媒影緊其他嘉賓，急急腳從另一入口進場企圖避過鏡頭，其男友邱德根孫兒邱華瑋，其後亦鬼祟匿入。但人算不如天算，剛巧佢老豆邱達昌要搭，門一開，邱華瑋（左一）和家姐邱詠筠（左二）、詠賢（中）和詠麒（右一）全部在內，真正躲也躲不了，最終邱詠筠大方說：「弟弟唱歌，我來支持佢。」
趙式浩 學習湊B
白韻琹大比數拋離對手當選跑馬地區議員，上個禮拜搞祝捷會慶祝，啱啱榮升老豆的卓能執行董事趙式浩亦是坐上客，白姐姐鬼馬地硬塞姪女個B給式浩話：「俾你學吓抱BB，你啱啱生咗。」睇見個B打出肚腩，就知佢兩個都唔合格。
雷禮權 美中不足
香港藝術中心於上週五的晚宴以大自然做主題，九巴董事雷禮權和太太利蘊珍都配合主題，雷生著迷彩扮自然界保護色，雷太就扮朵花。雷禮權自豪話：「帽在蘇聯買，衫搵裁縫做。」影相中途，雷還自爆話：「好似差咗支搶。」 ####
超蓮一坐低就攞咗阿媽件披肩冚腳保暖，見攝記狂影波隙，即刻叫助手攞衫、攞頸巾包胸。
壽星女收花又收蛋糕，開心地說：「以前的一切噩夢和心結都過去了……每個當下都是新的開始。」
薛芷倫遲咗一粒鐘，搞到傅明憲和巫雨平（右）忍不住在微博抗議：「我們都非常餓了，壽星女你到未？」
你見我唔到！（設計對白）
1136期
