真面目

老婆話事　靠曬外家　馬德鐘冇股份扮鋪王

2012年09月26日

自從去年 11月發生橫店狼啜陳嘉桓事件後，形象大跌的馬神（馬德鐘）近月積極洗底，高調同前 model、現為大學講師的老婆張筱蘭曬恩愛。

婚姻冇問題， 44歲馬神可以專心搵錢養家，除了密密北上拍劇賺人仔，更打算轉型從商。早前馬德鐘出席一家具店開幕，聲稱該店與哥哥合股，更投資全副身家買入相連鋪位，非常豪氣！不過本刊發現，無論家具店或鋪位股權，均沒有馬德鐘名字，反而他妻子張筱蘭與胞兄夫婦一同買樓開公司，靠曬外家。

2千幾萬間鋪都唔落自己名？馬神投資得好低調喎！

曾經幾度傳出離婚的馬德鐘與太太張筱蘭，近年感情愈來愈好，兩人經常唔怕肉麻在微博調情，即使發生橫店雙狼事件，張依然第一時間撐老公，更罕有地孖住接受週刊專訪，兩夫婦一齊解畫。

放大圖片

「快意」（ Finest）位於尖沙咀的鋪位以 2,600萬買入，物業由張明國及梁翠蓮各佔一半業權，兩人另外還持有 4個物業，共值約 6千萬。

放大圖片

見馬神巡鋪

「快意辦公室傢俬」位於尖沙咀漆鹹道南，樓高兩層，主打寫字樓枱凳。店中的寫字樓凳全由外地入口，價錢由 1千多至 7千不等，職員強調大部分產品由著名設計師設計。

放大圖片

店內有多名職員駐場，其中一名女員工表示知道馬德鐘有份投資，間中都會見馬神巡鋪。

放大圖片

店內擺放了多款辦公室家具，圖中的塑膠椅由意大利入口，約 1千多元，價錢合理。

放大圖片

馬德鐘近月高調與家人出席公開場合， 14歲兒子生得高大靚仔，更識法文、跆拳道及 4種樂器。《蘋果日報》圖片

放大圖片

現於上海拍劇的馬神，據知約收 10萬人民幣一集，吸金力強！

自爆買鋪

老婆投信任票，馬德鐘亦不敢怠慢，戒掉夜蒲努力做住家男人外，又著手搞生意搵錢養家。

正在上海拍新劇《同一屋簷下》的馬神，上週日（ 16日）帶埋老婆及 14歲囝囝馬在驤，為尖沙咀一間名為「快意辦公室傢俬」開幕，當日馬以主人家身份剪綵，聲稱瞓曬身投資該店，「哥哥做咗 20年，係做原創設計嘅寫字樓傢俬，下一步會喺天津開分店。今次我連買兩個地鋪，全副身家投資曬落去，可能做埋代言人。」

外家投資

放大圖片

今年母親節，馬德鐘特登由內地趕返香港陪外母過節，可見馬神與老婆的家人關係良好。

講到似層層，但有傳家具店並沒有馬德鐘份，而是由張筱蘭家人擁有。根據資料顯示，「快意」由「萬廣國際有限公司」全權持有，而市值約 3千萬的尖沙咀鋪位業權則由「天昇有限公司」擁有，兩間股東同是張明國及梁翠蓮，其中梁與張筱蘭一齊開公司，去年合資以 1,420買入屯門榮華花園獨立屋，兩人更報住同一地址。

口供與事實不符，本刊週一致電馬德鐘，他強調確實有份投資，「間鋪係我太太嘅阿哥同阿嫂名，佢哋喺呢行做咗好多年，而我同佢哋亦做咗廿年屋企人，所以好信任佢哋。其實我今次真係全副身家放曬落去，至於出咗幾多錢就唔好講喇，我哋協議咗要保密，但好多謝大家咁關心我！」