靠蘇基出生天 古明華鬥心返曬嚟
在無綫劇《巴不得媽媽…》飾演乸型蘇基變成網絡紅人的資深演員古明華，對於網民支持，他日前接受本報記者專訪時說：「我睇到佢哋將我啲角色call back返出嚟真係好感動，如果唔係今次佢哋咁搞，我本來諗住拍完呢套戲之後，轉去做配音，或者五年後先再拍戲。」撰文：何慧斯
因為無綫劇《巴不得媽媽…》中乸型蘇基角色爆紅網絡的古明華（古佬），訪問當日一口氣接受六間傳媒機構的訪問，再加上網友發起「一人一like撐蘇基攞獎」行動，支持他挑戰今年台慶最佳男配角或飛躍進步男藝員獎，古佬直言今次是他入行以來最大迴響的一次。
古明華在電視圈捱了多年，近日終憑娘娘腔的蘇基一角而人氣急升。攝影：陳慧安
在《巴不得媽媽…》中古明華跟汪阿姐及黃淑儀（右）有不少對手戲，但演技絕不遜色。劇照
轉行配音維生
對於這份驚喜，古佬說：「我入行最初嗰3、4年係有咁嘅希望，但係5、6年之後，已經認清楚自己喺電視台做係冇呢啲期望，只係當一份工咁返，只要你認真去做，絕對係冇問題，但係做耐咗之後，對份工冇乜希望，慢慢諗住放棄，直到有啲朋友同親人先後離世，我先發覺人生原來係冇乜時間，所以要訂立一個目標，唔可以再嘥時間，睇嚇未來嘅生活應該要點行。」
古佬續說：「為咗生活，我本來諗住拍完呢套戲之後，轉去做配音，始終做配音收入穩定好多，我家喺公司配音部日日都要做嘢，嗰度啲工作係唔會停，唔會積住啲嘢喺度，要不停咁去做。其實配音嘅工作都可以結合我學嘅嘢，有時同做戲一樣都好滿足，不過配音仲難啲，因為有個公仔規限住你，拍戲對我嚟講易好多，因為係發揮我自己要諗嘅嘢。睇到觀眾嘅支持真係好多謝、好感動，不過家都唔知會點，如果拍戲好似配音有穩定嘅收入，唔使諗，我一定會揀拍戲，但係呢個係公司嘅決定，唔到我揀。」
當年跟古明華在演藝學院畢業的還有陳錦鴻、詹瑞文和張錦程等。
90年在演藝學院畢業的古佬，同期同學有詹瑞文、劉玉翠、關寶慧、張錦程和陳錦鴻等，眼見同學在演藝事業的成績，古佬仍安守本份地工作，他說：「可能係我嘅人生觀改變咗，做人應該係每一刻要實踐你嘅生活，唔好浪費時間，咁多年我學識同人比較係冇意思，最好係同自己比，每日鞭策自己，要尊重同認真去做工作。」
談到飾演乸型蘇基，古佬笑說：「呢個角色拍嗰陣好多人都覺得好奇怪，話我原來做女人係咁上妝，我通常早個半鐘返嚟，成日都催佢哋要快啲，我話唔可以遲入廠，如果唔係對大家都唔好，一遲就成個廠都麻煩，其他演員又唔知點解要等人。老實講我都等過人，我都好憎自己嚟咗準備，個心態係嚟做嘢，呢啲少少有積怨，對成個team都好唔健康，越整越唔開心，唔係話淨係你，拍一組戲咁多人，我唔鍾意因為自己令工作環境唔開心。」
古明華一頭曲髮加上鬼馬表情，深得網民歡心。
感激星爺帶挈
提到94年在周星馳電影《國產淩淩漆》中演的公安阿頭，亂槍掃射梁思浩、鄧兆尊，其表現被網友勁讚。雖然不少人與周星馳合作過後，力數星爺的惡行，梁思浩更直言與星爺合作令他痛苦萬分，不過古佬說：「我唔知喎，拍呢場戲嗰陣，星爺話畀我聽要點做，效果係要點，可能場戲係分開拍，我完全感受唔到佢（梁思浩）嗰種痛苦，我冇痛苦，仲不知幾enjoy，嗌得好開心，嗰嚇好似將啲唔開心嘅事嗌曬出嚟，我不知幾多謝佢，拍佢嘅戲又特別多錢，佢實會超時，嗰陣我拍三組，次次都over，你可以睇到佢幾認真，我反而慶幸有機會好好做好呢件事。」
當年因為這場戲被內地禁映，古佬說：「我知呀，真係對佢唔住，我自己都因為呢場戲而冇乜點再拍電影，禁得佢冇理由唔會禁我呀？當然我唔係咁重要，反而星爺慘啲，佢冇得上內地幾年。」
.靠蘇基出生天 古明華鬥心返晒嚟
http://hk8news-d.blogspot.com/2012/09/blog-post_3410.html.靠蘇基出生天 古明華鬥心返晒嚟
http://hk8news-d.blogspot.com/2012/09/blog-post_3410.html
