娛聞樂
小生不和 陳豪藐對手唔夠班 陳展鵬：佢嫌棄我都冇辦法
2012年09月28日
電視城第一筍盤陳豪，一向是無 綫收視保證。他在新劇《天梯》中，飾演有情有義的癡心男，角色討好，更有女友陳茵媺傍實演出，令人氣再度攀升。
近日監製王心慰邀陳豪拍新劇《巨輪》，原本已應承拍攝的他，最後忽然辭演。推劇內裏原因，是他嫌棄同劇另一男主角陳展鵬未夠班與自己平起平坐，加上得悉對方角色亦正亦邪有發揮，風頭隨時蓋過自己。
遭陳豪藐爆，陳展鵬直話直說：「每個人都有選擇權，佢嫌棄我都冇辦法。」更有火：「好失望㗎！」
陳豪推劇有前科，去年中，他本來擔正梁家樹派系、張乾文監製的新劇《耀舞長安》，但最終因不想得罪另一派系的戲劇製作總監曾勵珍，便以開咖啡店為由拒接此劇。
棄展鵬 拍祥仔
其實自陳豪憑《溏心風暴》奪得 07年雙料視帝後，他的同劇對手一般都有番咁上下級數，要他紆尊降貴拍新晉小生陳展鵬，無疑令他自貶身價。據知情者透露：「本來阿 Mo（陳豪）都幾鍾意《巨輪》入面嘅角色，加上有鍾嘉欣、阮兆祥，拍慣拍熟，有曬默契。不過佢知道要同煎 Pang（陳展鵬）飾演兩兄弟兼孭重飛，就有啲介懷。其實今次煎 Pang嘅角色係演一個有野心，急功近利嘅警察，而阿 Mo（陳豪）就演一個腳踏實地嘅好人，角色發揮一般，變相好似搵佢做陪襯。咁啱上月俾佢知道金牌監製徐正康會回巢返嚟拍劇，仲會搵雙生雙旦做主角，其中一個係黎耀祥，佢咪主動問珍姐有冇機會拍囉！咁珍姐見兩大視帝碰頭有噱頭，就批准佢推《巨輪》嚟接呢套劇。」
夥拍鍾嘉欣
《巨輪》採用了 80年代至現今的香港及澳門做背景，有視後李司棋助陣，陳展鵬飾演急功近利的警察，會周旋於鍾嘉欣、貝安琪之間，大有發揮。上周三（ 19日）試造型活動，他更站穩正中間有利位置。
珍姐重用
陳豪轉拍徐正康新劇，造就蕭正楠執二攤上陣。但由於蕭比陳豪的人氣低一截，據知監製會大幅修改原有劇本，削減蕭戲份而加重陳展鵬的主線戲份。
女監製殺手
雖然遭陳豪嫌棄，但入行捱足 14年的 34歲陳展鵬，去年賣身十年俾 TVB後，即成女監製殺手。如早前王心慰監製的新劇《叛逃》，陳展鵬力壓同劇的吳卓羲，戲份多一大截成第一男主角。而曾勵珍早前亦下令所有監製，要全力穀陳展鵬上位。據知情人透露：「煎 Pang好識冧啲女監製，返工放工都做柴可夫車佢哋返屋企，加上佢成日上無綫製作部七樓打躉，圍埋同監製飲茶灌水，同其他監製都打好曬關係。佢係醒目仔，以後大把運行。」
陳豪：好恨同祥仔合作
對於推王心慰監製的《巨輪》，主動拍徐正康監製的重頭劇，陳豪接受本刊記者訪問時直認不諱。「係呀，我一直都等緊機會同祥哥（黎耀祥）合作，徐正康監製套劇 11月就會拍，真係好難得。」談到推掉《巨輪》會否感可惜，他冇直接回應，卻表示恨與祥仔合作恨足 7年。「嘻，我同祥哥都好耐冇合作啦。你知唔知呀，自從 05年拍《秀才遇著兵》，足足 7年冇同佢拍。原先上年我可以同佢合作拍一套時裝劇，但最後因為撞期冇得拍，我真係好恨同佢拍。（你係咪覺得自己同祥仔同級數，點都好過同陳展鵬？）又唔係咁講，但我都係覺得我同祥哥默契好啲，起碼我哋之前合作過，都知對方要乜。」
陳展鵬句句有骨
上周，記者到電視城訪問陳展鵬。對於陳豪辭演《巨輪》，他明言失望。「冇咗阿 Mo，失望當然有，我都未同佢合作過。（佢係咪嫌棄你？）咁每個人都有選擇權，佢嫌棄我都冇辦法。就算係問我，我都想同祥仔合作㗎。」
無綫熱捧年擔四劇
有高層曾勵珍及監製王心慰撐腰，去年已簽約 TVB的陳展鵬，星路扶搖直上，繼年中播出的《衝呀！瘦薪兵團》，他還有 3套孭飛劇等住出街。每套劇亦有一線演員傍住他，認真犀利！
.[忽然1周]小生不和 陳豪藐對手唔夠班 陳展鵬：佢嫌棄我都冇辦法
http://hk8news-d.blogspot.com/2012/09/1_28.html.[忽然1周]小生不和 陳豪藐對手唔夠班 陳展鵬：佢嫌棄我都冇辦法
http://hk8news-d.blogspot.com/2012/09/1_28.html
