十年人事笑與淚 破禁談情說恨Twins哭了

2007年，Twins的事業出現瓶頸位，正躊躇如何轉型之際，翌年發生了一單震驚全球華人社區的事件，此後，Twins要解散、要重組的傳言滿天飛。去年，是Twins成軍10周年大日子，經歷巨變的蔡卓妍及鍾欣桐重新合體，出專輯開紀念演唱會，並在過去四個樂壇頒獎禮中共奪7個大獎。「千祈唔好話阿嬌連累我，我好憎聽到呢啲嘢。」紅著眼的阿Sa說。「無阿Sa，我企唔翻起身。」阿嬌流著眼淚幽幽地說。「沒有過去那有現在的你。但過去是用來回味，不是用來逃避的。」僅以《天與地》中的金句贈Twins。 採訪：方騫平　攝影：張詠森

阿Sa打開天窗說阿嬌

近兩年，阿Sa好累，不論肉體上還是心靈上，幸好臉上未見滄桑，反而眼神流露前所未見的堅毅及勇敢。「農曆年我會休息，而家我可以好堅持，做藝人唔可以得output，一定要refresh，十年無真正放過假，最多一兩日，你唔放，工作人員都要放啦。以前年初三就要開工，今年會休一星期，打算同William去旅行，去邊就唔講嘞。」說到將可跟男友放大假去外地疏乎，阿Sa笑得相當甜。「放假後就要忙宣傳廣東話新專輯，今次隻碟講自由，係有感而發㗎，因為呢一兩年嘅心態有所改變，同阿嬌一齊經歷過最高同最低點，無乜嘢再可以傷害我哋，而家嘅生活係最開心。以前好多掣肘，要跟前輩行先至乖，拍拖唔可以講，做賊咁，好辛苦，所有拍拖應有嘅回憶都無，所以公開前好掙紮，最後覺得人生在世點都要做一件勇敢嘅事，公開咗又OK喎，或者咁做會失去一啲嘢，但得到嘅卻更為可貴。」

對於合體後出現好多聲音，當中Twins要靠曬阿Sa的言論最令當事人反感。「好多人話『靠曬我』，千祈唔好咁講，十年前無阿嬌唔會有而家嘅我，大家點解唔諗下，一個最佳組合就係單人同合體都可以殺曬，咁樣我哋先可以去到更遠，好似草蜢同軟硬咁。坦白講，成績唔係最重要，感情先緊要，我同阿嬌好似屋企人咁，千祈唔好話阿嬌連累我，我好憎聽到呢啲嘢，總之我哋缺一不可。」所以當日得知自己要單飛發展，阿Sa千萬個不願。「好多人話我丟低阿嬌，搞到我同公司講唔好出，下次先，但阿嬌同我講：『你都要食飯，無可能等，我唔想拖累你。』」說畢，阿Sa的眼淚已流過不停。「每人成長都有唔同經歷，自己都有，感謝個天畀經歷我哋，Twins好想做落去，好似草蜢咁，可以有25周年紀念。」問到新年願望，阿Sa急不及待。「身體健康，長命百歲。」

阿嬌哭著多謝阿Sa

阿嬌成熟了亦感性了，對於曾發表的Twins十年情宣言，還未開口，淚水已在其眼眶打轉。「之前，覺得前途好黑暗，感覺無曬前途，亦嚴重地感受到人情冷暖，成個世界都唔要我，乜都做唔到，根本無棲身之所，唯獨阿Sa，喺佢懷裏好Warm，因為佢不斷支持我，所以喺港台頒獎禮後，我喊住咁打咗段微博感激阿Sa，又打電話畀佢多謝佢，無阿Sa，我企唔番起身。1月21日係我31歲生日，過往2年都要喺無錫過，仲要喺一間房同一個劇組同我慶祝，今年終於可以喺香港過生日嘞。」正在更衣室換衫的阿Sa亦嚷著，「生日一定要搞大佢，要高高興興。」問到生日願望，阿嬌想了一想，「每日都有件事可以令我捧腹大笑。」

感性的嬌

「佢寫完微博，仲要喊住打畀我，搞到我喊住咁打邊爐。」阿Sa笑住投訴阿嬌。

Twins本來是一對的，阿Sa阿嬌兩個名字無從分開，二人互相扶持下度過了十個年頭。







逾400位Fans日前為阿嬌預祝今周六的生辰，阿Sa以阿嬌最愛的米奇老鼠Look驚喜現身祝壽，令阿嬌感動落淚！

阿Sa扮米奇 朗讀肉麻信 阿嬌生日兩度落淚

鍾欣桐（阿嬌）日前與其歌迷會預祝生日，舉辦《BB Gill生日會2012》，歌迷還送上一封大利是給她，內裏是一張由歌迷自製的信用卡，寓意是阿嬌可隨時隨地任碌歌迷的支持，令阿嬌十分感動。生日會上，歌迷作天才表演，有歌迷自創歌曲《撐你》，以表對Twins的不離不棄，阿嬌聽後也感觸落淚。

好想做妳的iPhone

於天才表演評分時，突然來了位米奇老鼠裝束的神秘人，即場讀出一封十分既搞笑又感人的信，當中肉麻字句包括：「最鍾意聽你嬌美的聲音、我想做妳的iPhone，可以經常陪住妳、我喜歡妳已經10年……」等，但阿嬌還是猜不到這個神秘人是誰，到阿嬌閉上眼時，神秘人才把米奇老鼠頭除下，發現原來是好拍檔阿Sa（蔡卓妍），此時全場歌迷立刻歡呼，但阿嬌仍顯得有點不相信，因阿Sa早一晚仍要通宵工作，又阿Sa原來1星期前已四處找米奇老鼠服飾，當阿嬌得知後，感動得再次掉下眼淚。

阿嬌生日，阿Sa玩神秘，扮成米奇並朗讀肉麻信。