挺胸短裙高踭拍賀歲片何韻詩喜劇潛質大爆發

「大笑姑婆」楊千嬅趕做龍媽媽，被逼辭演邵氏賀歲片《2012我愛HK喜上加囍》好好安胎，由何韻詩冷手執個熱煎堆走馬上任！外形man爆的阿詩，在戲中除要跟黃宗澤親吻外，仲要著短裙加高踭鞋演出，呢啲咪係為藝術而犧牲囉！撰文：方騫平　攝影：張詠森
由曾志偉、毛舜筠（毛毛）、何韻詩及黃宗澤等演出的邵氏賀歲片《2012我愛HK喜上加囍》已上映，除咗「老戲骨」志偉、毛毛同緊哥，肯定大放笑彈外，年輕一輩，好似何韻詩、阮兆祥、陳奐仁都好搞笑。平時何詩好cool，今個角色完全係兩回事，戲裏戲外都有發揮，毛姐更大讚她有喜劇潛質。
阿詩做自己
日前晚上，戴住黑框眼鏡，著短裙加腳踏兩吋高踭鞋，行到啞嚇啞嚇嘅阿詩在超市裏捉拿孖生賊仔阮兆祥及陳奐仁，祥仔發難，挺起大肚子，上下打量阿詩大罵道：「搜身呀？你個死八公呀，學人著裙？」阿詩即挺胸收腹，用man爆的身形話畀祥仔知，她是女兒身。戲如人生原來係真。
當晚開通宵戲，大家睇playback都笑餐飽，仲可以頂到眼瞓，惟獨黃宗澤要「守尾門」，等天光同志偉響壽司店拍一場交談戲，Bosco最後都忍唔住，「癱」響收銀機枱面偷眠，瞓醒後果然精神十倍，生龍活虎。雖然三更半夜，但仍然有好多真職員，留守超市唔走睇明星，從市民反應睇，部戲都幾吸引呀。

阿詩平時雌雄難辨，戲中實行挺胸收腹顯示女兒身。