吊鹽水
去年32歲中女廖碧兒為釣金龜林忠豪而狠飛陳豪，點知二人搭上唔夠半年玩完，入豪門無望，最弊貪錢港女形象深入民心，洗底有難度。
廖碧兒唔只形象大插水，又成娘家TVB棄將，今年9月靠黐何麗全過檔now TV做主持但未能再添食；想學佘詩曼北上掘金，奈何內地知名度有限。廖碧兒事業進退失據，據知廖最近更主動向「城市電視」主席王維基 撈拍劇失敗，正式黑開有條路。
近來廖碧兒的眼光可謂連番出錯，先撇拍拖6年的「筍盤」陳豪，撻着林忠豪又箍唔實，標尾會失敗之餘，今年又與TVB鬧翻博外闖掘金，可惜人氣大不如前。
企硬唔減價
形象負面的廖碧兒，除咗早前收每集3萬酬勞替now TV主持英文飲食節目《The Maverick Chef》之外，據知她仍堅持出騷價由2萬起跳，近月工作量已買少見少。雖然已簽約佘詩曼同一經理人，但因內地零人氣加上中文麻麻，早前只拍畢古裝劇《深宮諜影》擔演閒角貴妃，戲分與同劇擔任男主角兼舊同事鄭嘉穎差天共地。
冇人肯接貨
有指廖碧兒知衰而搵娘家求救，不過TVB嫌佢獅子開大口，立即拒絕。據廖碧兒身邊人透露，廖日前主動致電王維基自薦拍劇，仲話：「如果你（指王維基）開劇可以搵我，我家去邊度拍劇都得！」，據知王維基卻因對廖興趣不大而拒諸門外。上週二（13日）廖碧兒出席活動時，回應向王維基撈一事：「可能有啦，都係公司幫我搞。（家仲有冇同now合作？）之前做過飲食節目，暫時都係上去做訪問同做嘉賓。我遲啲會上大陸拍劇，但未可以透露詳情住。」睇嚟廖碧兒要改善吓個拜金形象先喎！
過期金蛋
07年曾是TVB最搵錢花旦的廖碧兒，當時已曬命話要交過百萬稅，但今日淪落到冇電視台要，衰貪錢累事囉！
變大茄
今年中，廖碧兒不獲TVB續約，而轉戰內地拍《深宮諜影》，但跟同劇的米雪及鄭嘉穎相比，只屬行行企企的大茄。
友情job
10月初，廖碧兒為海南島觀瀾湖度假村拍廣告專輯，有指靠死黨丁子高幫手促成合作。
冇下文
在now TV首席副總裁何麗全搭路下，廖碧兒以3萬蚊一集主持英文飲食節目「The Maverick Chef」可惜上月中出街都冇乜人知。
有欠債
喜歡買物業投資的廖碧兒，04年以233萬購入新都城寓所現已供完，而07年父親廖永怡購入550萬的灣仔尚翹峰單位仍在供款。但本刊查詢記錄，發現廖碧兒和一名叫「廖永揚」的人註冊的Macbailey International Limited公司，現時欠債達112萬。
內地掘金
唔少TVB當家花旦，挾劇集人氣返內地拍劇即變搶手貨，酬勞幾何級上。
佘詩曼
以前以2萬一集在TVB捱騾仔的佘詩曼，家在內地每集叫價達25萬人仔，待遇真係天與地。
胡杏兒
胡杏兒之前在內地片酬每集收8萬，貴為出爐視後，即跳升至每集20萬人仔。
楊怡
近年爬上一線花旦位置楊怡，今年首度接拍內地劇《後宮》，已袋走200萬人仔，現時叫價約8萬一集。 ####
遲啲上大陸！真實對白
上週二（13日）廖碧兒聽到𡃁撈一事，一直支吾以對，動作多多，又搵助手同公司擋駕，大耍太極
俾佬撇
去年底廖碧兒為搭上李澤楷表弟林忠豪而撇陳豪，但在10月底，林忠豪已高調力追莊思敏和約甄詠珊飯聚。
唔係個個要㗎！設計對白
王向TVB幕前幕後挖角冇手軟，對廖碧兒主動撈，其公關回應話：「不就市場傳聞作回應。」
廖碧兒最後播出嘅TVB劇集，是去年底的處境劇《依家有喜》，當時受分手醜聞拖累而收視麻麻。
25萬一集
20萬一集
8萬一集
239期《FACE 週刊》
