FBI File
前排因用緋聞男友吳卓羲微博上載自拍床照，而撈掂娛樂版位的張馨予，上週終於現身香港，拍攝由曾志偉執導嘅賀歲片《2012我愛HK喜上加囍》，上週四（15日）更踩入無綫電視城進行拜神儀式。
於導演位匿足3粒鐘後，終於輪到張馨予埋位，一除低張黑毛氈，變身性感短裙妹嘅張馨予成個生猛曬。
FBI所見，儀式進行前，導演曾志偉同毛舜筠早已埋位等切燒豬，但張馨予一直匿埋唔見光，最後要勞動志偉親自請佢出嚟亮相。
原本經公關講明拒絕做訪問嘅張馨予，最後被在場記者苦苦追問，即得戚用國語話：「來吧！始終要面對！」以為可以食住香港記者，點知講講吓咪又係認衰話為放床照於吳卓羲微博事件道歉：「我真的不小心，是一個低級錯誤，要向相關人士道歉。」得罪記者冇好結果，唔使FBI再多講喇啩？ ####
上週四，張馨予除踩入無綫電視城進行拜神儀式，夜晚即走去中環皇後像廣場為《2012我愛HK喜上加囍》開工。當晚等埋位期間，張馨予一直匿埋唔同其他演員溝通，FBI撩佢傾偈時，佢答都費事：「我不舒服，我不說了！」叫吳卓羲錫番囉！
買佢怕
喺電視城舉行切燒豬儀式時，（右起）曾志偉、馮淬帆、邵音音同麥長青一齊等張馨予出嚟。張馨予行出嚟嗰陣，麥長青即遞手示意，畀個中間位佢企，全世界怕咗佢。
志偉幫口
最後要志偉哥親自請佢先肯出嚟，當時大班記者要求張馨予講吓吳卓羲，志偉亦幫口，但張馨予只係強顏歡笑，死都唔講。
情敵示威
有傳吳卓羲與徐子珊經常以情侶檔搵真銀，搞到張馨予不滿，上週日吳卓羲同徐子珊出席《法證III》慶功時依然糖黐豆咁影合照，仲公開話工作上唔需要向其他人備案，咁樣講唔驚張馨予又發癲咩？
Bosco唔睬
停機後，企喺張馨予身旁嘅黄宗澤，一直擰歪面撩工作人員傾偈，避免同張馨予惹緋聞。
唔認姊妹
曾經係張馨予嘅好姊妹潘霜霜，上週咁啱又嚟香港為電影試鏡，仲有機同甄子丹合作，但霜霜上週五晚出席搜狐活動時就話：「她（張馨予）已跟傳媒說我們不是朋友，那就不是。」劃清界線。
239期《FACE 週刊》
