博セ呀
踏入12月中愈來愈凍，唔想變雪條惟有冷帽手襪全日跟身。普通人由頭包到落腳都冇人理，可憐一班要靚又要命嘅星就唔可以成隻糉咁行出街，尤其要喺11、12度低溫下拍落水戲更加攞命，係時候拎曬啲秘密武器曬冷！
周秀娜浮誇手套
喺北京拍緊電影《唐朝浪漫英雄》嘅娜姐Chrissie，雖然心口兩團肉夠曬分量，不過北京家0度，太陽落埋山分分鐘負幾度，上圍幾豐滿都假！好在娜姐人緣好，收到同劇內地演員送暖手枕，夠cutie又夠保暖。物輕情意重，娜姐男友Avis都冇咁細心喎！
方力申凍到凸點
同娜姐拍緊同一套戲嘅小方，做開運動照計冇咁怕凍，點知遇着導演大整蠱，安排佢兩個天寒地凍拍落水戲，仲拍足兩個鐘！娜姐都有套古裝戲服頂檔，小方就慘到毛巾都冇條，赤膊落水凍到凸點，唔讚佢專業都唔得呀！
Stephy免費暖腳
同樣要北上拍戲嘅「小方嫂」Stephy，唔知係咪男友晚晚喺電話嗌凍，所以臨出發前預備咗大量超厚外套同長靴，而且對對都非常colourful！望真啲，原來係有贊助大手筆送禮，又暖又唔使自己畀錢，做星真幸福！
陳敏之暖袋護體
一向體弱嘅陳敏之，早前為《東西攻略》拍落水戲，當日氣溫得12度，好在醒目敏之自備暖水袋，係就係細細個唔太幫到手，起碼好過冇囉！ ####
暖手套有狐狸又有太陽花，有禮收娜姐開心到拎住狂擺pose影相。
兩個都唔再係金牌人，但古巨基都專程去探小方班，好兄弟！
鬼咁凍仲要冇衫着，小方（左）唔凍到凸點就奇啦！
Stephy收咗adidas咁厚禮，喺微博幫手宣傳都好應該嘅！
啱啱攞完「最佳女配角」，但敏之仍然愛用鬆弛熊暖袋，好有童真喎！
238期《FACE 週刊》
