博セ呀
又到聖誕、又到聖誕，仲有幾日就係聖誕節兼一連3日公眾假期，諗起都開心！我同你都有假放，不過要趁大時大節賺錢嘅明星就要繼續開工！冇假放，惟有自製氣氛娛人娛己，聖誕樹同聖誕裝飾擺到一屋都係，好過冇啦！
古仔Sammi提早穀戲
好耐冇一齊拍戲嘅古天樂同Sammi，終於有由杜Sir執導嘅《高海拔之戀II》。雖然Sammi家有安仔呢個真命天子，但話曬同古仔都係過氣緋聞情侶，兩個人又去到雲南咁山卡啦拍攝，點都有gimmick！套戲出年2月先上，但佢兩個已經趁聖誕出動宣傳，出名係Mr.Cool嘅古仔仲擺出一副cutie樣，粉絲睇到肯定冧爆！
陳法拉聖誕老豆
事先張揚會返美國過聖誕兼休養的法拉，完成埋手頭上工作就即刻起程，同行仲有老公薛大少陪住咁sweet，賺少幾個聖誕騷都冇所謂。好日唔返美國探親，法拉爸爸晨早預備自家製臘腸等乖女食餐飽，而法拉都好應節，特登key個聖誕老人頭落daddy張相，當堂開心曬！
蔡卓妍公仔冧狗
阿Sa自爆男友陳偉霆聖誕唔喺香港，冇男友攬住sweet，惟有將屋企布置得有氣氛。29歲阿Sa仲好有童真，掛咗大量熊公仔同雪人响聖誕樹上，搞到佢嗰隻叫「朱古力」嘅玩具貴婦都睇到笑曬口囉！
Jeana串錯英文
傳有兩層共千五萬豪宅揸手嘅D cup乳模Jeana何佩瑜，近期零舍風騷，早前喺街見到隻巨型聖誕老人公仔，都忍唔住即刻拎上手玩餐飽！不過連Christmas都串錯做「Christams」，身材同才能成反比啫！ ####
身為虔誠基督徒，Sammi嘅聖誕願望唔係要收咩名牌手袋，而係感謝主，果然信主得愛！
難得Mr. Cool笑得咁開心，「鄭四萬」亦配合交戲，齊齊笑到見牙唔見眼！
陳爸爸在美國家中預備咗咁大盤臘腸，法拉想唔肥都難！
即將放大假，法拉前排去新加坡都唔介意大大啖炒河放落口。
臨近聖誕，阿Sa密密着紅衫，好應節！
阿Sa話佢隻狗「朱古力」最鍾意坐喺聖誕樹側邊傻笑，同主人一樣咁開心喎！
有兩層豪宅做聖誕禮物，Jeana呢個聖誕應該過得好開心！
239期《FACE 週刊》
