好大壓力
入行至今，28歲鍾嘉欣一向目標明確，努力賺錢買磚頭，06年已買入將軍澳新都城一個6百多呎單位首次做業主，踏入2011年，本刊亦發現她再以550萬購入另一個新都城千呎單位，1個女人仔孭起2層樓。
單拍劇又點夠供樓？好彩鍾嘉欣觀眾緣好，深受廣告及品牌歡迎，最近仲轉埋唱片公司又話出碟。不過為供樓日捱夜捱，嘉欣終於出事捱壞身體，面上更出濕疹，有苦自己知。
無綫花旦個個搏命，鍾嘉欣初入行已經講明只係求財，是非、緋聞唔好埋身，密密做，終於咪捱到殘。
西藥調理
最近出席活動勁厚妝，細睇仲發現在面上腫起一笪笪，經本刊追問下，嘉欣承認日做夜做捱壞身體出濕疹。「係，時好時壞，免疫系統出現問題。家keep住有調理，會試西藥先。」
據知TVB姐仔出名個個捱到殘，最近鍾嘉欣已向身邊人猛呻唔夠瞓，拍劇之外又要準備出碟，壓力爆煲。知情人說︰「Linda下年又再出碟，唱片公司希望佢走唱作歌手路線，所以佢就算收工都要寫歌，壓力好大，又冇假放。」
搬千呎竇
日捱夜捱，鍾嘉欣為嘅都係投資物業穩打穩紮。嘉欣自06年已經以近2百萬購入將軍澳新都城1個6百多呎細單位，今年1月再豪擲5百多萬於同屋苑購入另一個1千呎嘅單位，孭2層樓，加埋月供4至5萬，唔搏唔得。鍾嘉欣解釋︰「之前嗰間1個人住夠嘅，但如果父母來港就唔夠喇，早排去睇樓，覺得價錢合理，舊居又可以出租，咪決定買囉。（新居已升值百多萬？）升咗少少啦，我比較穩陣，唔識投資、又唔識買酒莊，主要係買磚頭，女仔應該有層樓嘅。」同嫁有錢佬豪買半億酒莊嘅趙薇比，靠自己嘅鍾嘉欣真係視圈清泉呀！
嚴重會爛面
濕疹好難斷尾，樂壇天後Sammi受濕疹困擾好幾年，經常發現佢損手爛腳，但最慘鍾嘉欣今次生喺塊面，著名皮膚科醫生史泰祖說︰「成年人主要成因都係休息唔夠、壓力同免疫系統亂咗。初時會又紅又腫，最嚴重會出現水泡同潰爛，不過濕疹通常只會傷到表皮，很少出現永久性疤痕。」
3年先放1次假
04年華裔小姐冠軍鍾嘉欣同年簽約無綫開始拍劇，最高峰一年拍5套劇，明年更起碼有4套劇上，算係多產花旦，但賺得愈多，嘉欣就愈慳家，出入都係搭地鐵，而且甚少放棄搵銀機會。近3年，佢只係上年9月家姐結婚，先肯放3星期假返家鄉加拿大度假，之後就未放過長假。
花旦捱出病
TVB出名「善用」花旦小生，加上鬧小生花旦荒，所以最近幾位阿姐都捱出病，被迫停工。
陳法拉 面癱
自爆面部三叉神經痛持續兩個月，時好時壞，醫生仲話未必會完全康復，並有面癱危機，法拉擔心到即刻辭演《名媛望族》返美休息。
楊怡 歪下巴
上年一口氣連拍4部劇，後來持續感冒入院做身體檢查，發現因為長期缺乏休息，令下巴神經受細菌感染，以致肌肉硬化，下巴仲歪埋，決定停工半年。
陳敏之 跌斷鎖骨
為《怒火街頭》拍攝一場當街裸跑戲，結果因天雨路滑而跌斷左邊鎖骨及頸椎，其後更患上腎炎，全身暴脹口腫面腫要入院長唞，當時拍緊《為食一條街》都立即暫停。 ####
鍾嘉欣企圖以厚妝遮濕疹，可惜愈遮愈覺，可以睇到佢兩邊面同額頭，都腫起一笪笪。
再次殺入樂壇，鍾嘉欣最近簽約星煥做唱作歌手，唔放過任何賺錢機會。
免疫系統出問題！真實對白
勁厚粉：話曬都靠個樣搵食，塊面生濕疹可大可小，被問到面上一笪笪，鍾嘉欣顯得好擔心。上星期出席活動更以勁厚粉遮濕疹。
日捱夜捱，今年終於憑Miss Koo一角人氣急升，可惜頒獎禮食白果，得個做字。《萬千星輝頒獎禮》當晚嘉欣已不斷照鏡，濕疹開始發作。
逃唔出將軍澳鍾嘉欣已搬入今年以550萬購入嘅新都城千呎新居，最近仲將舊居放租，佢話之所以連買2個新都城單位，是想趁低吸納。
鍾嘉欣一向身體麻麻，06年，好姊妹楊思琦（黃衣）帶佢去九龍城睇中醫調理身體。
皮膚科醫生史泰祖
2012《護花危情》
2012《抉宅男女》
2010《耀舞長安》
2011《點解阿SIR係阿SIR》
2012《當旺爸爸》
網上圖片
239期《FACE 週刊》
