[東週刊][Dress Code]查理絲花朗 完美辣星

完美辣星

查理絲花朗 Charlize Theron

南非女星查理絲為新戲《中女翻叮日記》（Young Adult）出席紐約首映，佢以今季大熱嘅顏色皮製服飾示人。又高又瘦嘅佢，喺紅色貼身皮裙下冇半點肥肉，佢嘅nude色妝容及涼鞋更同一身打扮襯到絕。

愈改愈錯

Fergie

The Black Eyed Peas主音Fergie嘅衣著時好時壞，今次佢嘅打扮直頭慘不忍睹，佢將呢條印有Felix the Cat嘅裙改到七彩，唔止喺胸前加咗個大蝴蝶，背後仲唔拉拉鏈兼加件黑色打底衫咁著，完全唔覺設計特別，反而覺得佢根本唔啱著條裙。

比例拉短

史嘉娜祖漢遜 Scarlett Johansson

性感尤物史嘉娜於裸照事件後，首度公開露面，佢出席《翻身動物園》（We Bought A Zoo）首映時，繼續性感。可惜條裙兩截嘅設計，即時拉短佢嘅身體比例，唯一可取嘅係佢個起角髮型，特別之餘，亦襯佢面形。

剪出個性

Rooney Mara

荷李活版《龍紋身的女孩》（The Girl with the Dragon Tattoo）近期熱爆，女主角Rooney Mara嘅演出更技驚四座。日前佢出席電影倫敦首映，著上白色晚裝，顯出久違嘅溫柔一面，齊蔭髮型同化妝亦凸顯佢嘅獨特個性。