為何離奇消息滿天飛？心水清政圈老友指，選委會選舉結果對CY不利，隨即就傳出「阿爺阻梁入閘」的消息，須知好多市民唔想北京幹預，而且普遍支持弱者，如有人打「哀兵牌」，講到CY形勢危急，肯定可以推高民意。對某傳媒而言，爆嚇北京係「幕後黑手」，又可以賣紙，何樂而不為？
幫CY打心戰的人，未必一定是梁營助選成員，例如早前有某親中元老就實牙實齒指，中央不願建制派有兩人競逐，以免泛民漁翁得利，所以他得到一百五十票入閘的可能性不大，因為中央既已發功，就一定一發到底，不容有失。老人家一直否認挺梁，甚至為此數度與某報交火，但他的說法客觀上幫了振英哥，則十分明顯。
知情人士認為「阻梁入閘」的消息同屬不確。「近期很多所謂『接近北京消息』，可能是有心人的猜測，又或是競選策略，不排除有人營造『中央打壓』的假象博同情。中央至今冇表示過不讓CY入閘，相信他拿夠入場券應冇問題。」
對於梁營中人四出放消息，有人以「寶藥黨」來形容。某政圈人士上周日去沙田馬場出席國泰國際賽，席上有挺梁人馬分別同佢咬耳仔，話聽到個秘密消息：阿爺已經改撐振英哥啦，大家唔好押錯注，CY至係真正「寶藥」。如果該位政圈人士是牛頭角順嫂，可能已經中招，好彩佢唔係，一聽就覺得「寶藥」之說疑點重重，信就戇居！
