國台扮
導演林超賢新片《逆戰》將在明年一月中上映，拍攝期間撞正鋒芝婚變，謝霆鋒日日頭版見報，令身為第一男主角嘅周傑倫變成路人甲乙嬲到震；另一邊廂，霆鋒又嫌自己戲份唔夠重，有關電影所有宣傳活動全部no show抗議。所以話，「小氣」並唔係女人嘅專利。
坐歪唔妥
今年年中，鋒芝婚變鬧到滿城風雨，當時身在馬來西亞嘅謝霆鋒，與周傑倫、林鵬、白冰、廖啟智及金燕玲等趕拍林超賢新作《逆戰》。各地記者到片場日夜追訪失婚男主角，身為亞洲天王嘅周董俾人當透明，把口話唔介意，查實被霆鋒搶曬鏡極之不滿。
話曬係第一男主角，周董戲中留鬚扮安全局探員，危險動作親自瞓身上陣，當知道《逆戰》安排明年賀歲檔上畫，講到明願意全力配合宣傳穀房票。
周董開口撐，點知霆鋒玩嘢，眼見新戲入面十惡不赦做大賊，飾演周董阿哥。做唔慣綠葉，霆鋒唔happy，明明無乜工作在身，堅持缺席所有電影宣傳，搞到周董㷫爆。
No show抗議
「周董覺得呢套係自己動作片嘅代表作，放咗好多心機落去，點知霆鋒臨時唔肯合作做宣傳，周董唔嬲就假，好多安排好嘅活動要被迫取消，霆鋒擺明玩嘢。」知情人說。雖則周董拍過荷李活大片《青蜂俠》，但只係做配角「加藤」，今次孭重飛當然唔想有閃失。你有你瞓身宣傳，霆鋒堅持做性格巨星。無論係九月尾煞科戲，抑或上月去北京舉行發布會，全程無影，一個人頂硬上穀戲嘅周董，咁啱撞正新碟宣傳期，唯有分身抽時間來港兩日，為《逆戰》一次過做了十多間傳媒車輪式專訪，唔想心血作零宣傳無人理。
焗死細路
兩個男人鬥小氣，同場拍戲又要鬥chok鬥有型，霆鋒唯一最俾面係戲中來自馬來西亞嘅8歲童星妹妹仔。劇情講霆鋒被奸人所害，阿女被打毒針再包膠袋丟落海，細路替身難搵，加上有水中拯救大特寫，小妹妹焗住親身上陣。化妝化到滿面血斑，小妹妹當然唔歡喜，聽聞當時霆鋒要同工作人員一齊氹佢扮死入膠袋，好在小妹妹落水後無鬱無掙紮，最後導演一take過拍完，收工！ ####
上月尾，周董與戲中兩位女主角白冰（左）及林鵬（右）出席北京舉行的新片發布會，霆鋒無影。
除了危險動作，霆鋒與洪天明細佬、洪天照埋身肉搏，拳拳到肉。
十多場駁火戲，霆鋒揸槍掃射，曾因槍口走火辣傷手部。
無論跳貨櫃抑或爆破場面，在戲中飾演安全局探員嘅周董，搏到盡親身上陣。
在貨櫃場內的重頭戲，目的為拯救在戲中做醫生嘅女主角林鵬。
曾參演不少馬來西亞電視劇的八歲童星飾演霆鋒女兒，被透明膠袋密封丟落海，由於難搵替身，工作人員唯有幫小妹妹做足安全措施。
幾名工作人員夾手夾腳抬小童星落水，並以威吔固定，慎防沉入海底。
小童星著保護衣被吊威吔落水，見到自己化咗個爛手爛面妝，即刻扁嘴。
呢場跳海戲，霆鋒繼續唔要替身，話跳就跳。
1136期
