社交圈
名人嘅心態真係好奇怪，你話冇心理準備，樣衰唔想見人我明，但當出席公開場合，擺明有記者都要閃閃縮縮，學吓ball後薛芷倫啦，凍到起雞皮、現血管，一樣笑住任影。
利蘊珍 咪咪見人
上週三，利孝和夫人女兒利蘊珍創立嘅「運動燃希望基金」成立，「今日請咗百幾個嘉賓，全部都係支持我嘅朋友、捐錢去基金嘅人，而家籌到七位數字。」大日子，利蘊珍當然要扮到靚，所以佢無懼天寒地凍，打開心口等咪咪見吓人，反而佢十七歲嘅女雷正殷（右）就皮草上身，保暖要緊。
陳復生 女兒省鏡
久未露面嘅十姑娘何婉琪前新抱陳復生（小圖），上週六出席電影《花鼠明星俱樂部3》首映，出得嚟預咗有記者，但佢行為鬼祟，一見記者就閃，問佢嘢就借「聾耳陳」隻耳，掂行掂過，相反佢嘅一對仔（右）、女（左）就唔避鏡頭，大方得多囉。
薛芷倫 爆血管
亞洲先生本週日於亞視大埔錄影廠舉行，身為評判之一嘅薛芷倫雖然凍冰冰入到新界，仍堅持靚靚，只係皮草披肩加晚裝見人，凍到手臂現曬血管，講起啲仔仔佢依然充滿熱情，「我支持亞洲男士，身材、口才、樣貌都重要，舊時興大隻，而家興柯震東咁嘅可愛型，好似邱士峻呢個style。」
李彩華 爭取時間
女人濕平嘅瘋狂狼樣真係唔多見得人，好似李彩華咁，上週二同金融男友Derek Poon喺ifc睇戲，拎住個Kelly袋嘅佢，趁男友買飛時走咗去連卡佛睇嘢，一時睇吓鞋、一時睇吓衫，不過買飛時間有限，李彩華好快要落返戲院入場睇戲，shopping，留番下次啦。 ####
1137期
