跑馬仔戰情轉熱，市民開始有追電視劇心態，茶餘飯後熱烈討論CY乜乜，唐唐物物，各有心水，好不熱鬧，而某些傳媒亦投其所好，發揮無限創意，大爆似是而非「內幕」，識嘢人士得啖笑，讀者亦知這類新聞吹吹嚇，就當係睇連載小說，是真是假不會認真考究。
某報上周初大字標題「中央屠狼」，話有消息指阿爺下達封殺令，唔畀CY入閘，但只隔兩日，該報忽然又在頭版爆料，說習近平撐振英哥，並指前國家副主席曾慶紅都企埋習一邊。習近平乃政治局常委，又是國家副主席，百分百係中央大員，為何「中央」又屠狼又撐狼，莫非有關記者思覺失調？
最有趣是，擔任該報主筆的某知名國情評論家，在社論中直指習近平撐梁的報道戇居，一來習近平屬江派，豈會支持CY；二來特首人選一定由最高層拍板，冇可能唔同人有唔同取向，所以有關說法並不可信。一份報紙自己打自己嘴巴，實屬相當罕見，可能高層亦知新聞搞錯咗，所以用社論兜番。
究竟單料點嚟，江湖有個傳聞。話說最近一次聚會，某月刊編輯吹水唔抹嘴，話習近平其實撐CYo架，該報記者聽到，以為有料到，急急匯報，結果上頭決定大做，於是出咗呢段頭條。
除了這笑料，最近還有另一離奇消息，說前港澳辦主任廖暉南下深圳，入住麒麟山莊，親自遙控選委會投票，對CY狠下殺手，阻佢入閘，結果令挺梁選委買少見少。消息經過傳媒加工，聲稱消息來自「接近北京人士」，就變得似層層，真嘅咁！
傳聞指前港澳辦主任廖暉南下「狠下殺手」阻振英哥入閘，同樣是噏得就噏，創意無限。
但真正有料到的知情人士指，此類消息純屬「創作」，廖暉在選舉期間身在北京，並冇南下，在現階段中央亦唔會插手選委會選舉，以免被人大做文章。
他直斥有關消息噏得就噏：「說習近平撐梁，廖暉撐唐，簡直是亂吹。習現任中共港澳工作協調小組組長，廖暉是常務副組長，兩人對港澳事務經常密切交流，冇可能唱對台。更重要是，中央是集體領導，不是一個人說了算，支持誰是協調小組的集體決定，所以傳言某領導人撐某某，都不符合中央決策常規！再講，消息指曾慶紅撐梁，更屬無稽，曾是江澤民派系主將，點會支持CY？」
某報早前更將前港澳辦主任魯平拉埋落水，說他最近到珠海，放風救振英哥，換言之，連白頭魯亦撐梁。知情人士認為呢段料更錯：「兩人關係一向不佳，怎會撐他？魯平每逢冬天都會南下，住在兒子購買的樓房避寒，同特首選舉絕對冇關，又是另一吹水之作！」
