媽咪姐手帳
拍過《野蠻奶奶大戰戈師奶》同《古靈精探》等劇嘅無綫監製張乾文日前嫁女擺酒，呢啲場合一定多星睇之餘，仲可以睇埋佢哋嘅人氣、人性同品味㖭。事不宜遲， 就等媽咪姐搞埋個頒獎禮，賀一賀佢先！
汪明荃
汪阿姐繼《台慶頒獎禮》嗰件後現代人造衞星裝後，又帶俾我哋新驚喜!佢呢身由頭紅到落腳嘅打扮，絕對一絲不苟。連手套同絲襪都係紅色喎！你估咁易搵㗎？哎呀，唔知仲以為佢係新奶奶㖭。
羅仲謙
08年，羅仲謙初出道，張乾文已經搵佢拍《尖子攻略》嘞，所以大隻謙雖然無留低食翅，但點都到一到， 擺低封大人情。跟住， 已經俾班姊妹團大包圍， 團體影完又影單頭， 羅生都無say no㗎！上緊位喎，要搏啲。
周麗淇
歌壇搞唔掂， 周麗淇疊埋心水拍電視。依家拍緊嘅新劇《女警愛作戰》，監製咪就係張乾文囉！咁就梗要拎住個Hermes嚟撐場。佢同大隻謙都係到一到就走， 但都俾兄弟團捉住狂影。你睇班兄弟笑到見牙唔見眼， 就知呢塊人肉布景係幾咁珍貴同受歡迎啦！
謝天華
謝天華呢排心情唔多靚（點解？陣間睇埋後頁就明㗎嘞！），一嚟到見有記者影相，都有啲黑面㗎。不過， Laughing哥畢竟出嚟行走江湖咁多年，好快就自動波行埋去恭喜張乾文，仲攬曬㖭（上圖）。嗱，TVB唔俾視帝你做，但呢一刻， 媽咪姐確信你係最佳男主角㗎！
朱慧敏
一向以索爆形象示人嘅朱慧敏，呢日同張乾文嘅「禦用演員」郭政鴻結伴去飲。嗯，前面睇，的確叮一聲！但睇埋後面，就嘩一聲！媽咪姐見識少，但對絲襪爛到咁， 應該唔係fashion嚟㗎呵？ ####
最激衣着
最佳男布景
最佳女布景
最佳男主角
張乾文
是日最
857期
