老娘駕到
六十七歲的白韻琹，上月在區議會選舉中，以一千二百多票，贏了樂活選區的議席成為區議員，跟立法局議員的老公謝偉俊（Paul）孖住上。向來語出驚人的她，提起阿Paul曾有過「感情缺失」，她哈哈兩聲說：「嗰單都唔算，再勁啲都仲有。」當了議員，依然故我談情說性，唯一要改，「我唔可以再匿埋做宅女。」自言青春無敵的白姐姐說。
夫妻檔
被指種票、空降樂活選區的白韻琹，這天帶住記者落區走一趟，由她受浸的教堂，再到讀書時的聖保祿中學，行到禮頓山社區中心，她獲勝的投票站，沿途不少街坊和市民，跟她打招呼和恭賀她當選，雖然明年一月她才正式上任做區議員，但已有街坊向她表達意見。白姐姐一臉自豪說：「你睇吓，街坊係支持我，我唔知乜嘢係奇跡，我只知有人想屈我種票，呢個區人口平均收入有成九萬元，班街坊有一定知識水平，唔係傻，同埋呢度搵間老人院都無，我在呢個區住過廿幾年，你話我熟唔熟！」即使被打壓指她一把年紀，質疑其工作能力，白姐姐仍一貫口吻說：「我叻過班後生，自己仲青春無敵，平日我好宅女，留在屋企唔出街，依家唔得啦。」她跟謝偉俊，一個是區議會議員，一個是立法會議員，政界夫妻檔實屬少有，白姐姐卻說：「我就無乜感覺，我亦無打算再入立法會，佢有佢嘅工作，今次佢好少來幫我，靠自己打江山會更好。」
缺失老公
雖說做嘢要靠自己，但每當提起細她十五年的阿Paul，總是唔怕骨痺大讚特讚，她更形容這段不是姊弟戀，而是兄妹戀，「我大過佢，而且佢話我好粗豪，成個麻甩佬咁，佢份人就好細心周到，所以我係兄，佢係妹。」年初上電視，白姐姐公開同阿Paul廿二年來從未接過吻，形容要「食自己」，惹來全城嘩然，問她為何要這樣說？她說：「我生存就預咗俾人鬧，我咁自我，但總有人喜歡我呀。」此事阿Paul有沒有嬲過？白姐姐細想一下說：「我估佢無，但我諗佢唔敢，咁有乜辦法？攬吓錫吓呢樣嘢無得勉強，無呢方面幸福，我認命，希望等第二世。」說完一輪心中情，白姐姐又好識趣的說：「阿Paul都有其他好處，佢係一個好細心的人，對法律好有熱誠，佢在法律界受好多創傷，過去十幾年，連正常興趣都唔去諗。」
眼前同輩的朋友，有兒有孫享受家庭樂，白姐姐話她不會羨慕人，「不過有段時間我確實好失落，諗吓掃街的工人，返到屋企都有人攬吓錫吓佢，依家我無諗啦，俾我健康快樂，服務吓社會。」
男人愛播種
○九年謝偉俊被傳媒踢爆，與年輕青島姑娘徐程程發挑情電郵，身邊男人有感情缺失，白姐姐很快便平息事件，她哈哈兩聲說：「再勁啲都仲有。」追問下，白姐姐比上電視那次收斂得多，「我唔去了解啦，佢份人又唔係花心，但有些女仔扮可憐、扮慘，佢性格好易同情人又鍾意幫人，當自己係救世主。」 近日連特首候選人唐英年都被踢爆有「感情缺失」，站在女性角度，白姐姐坦言做女人就要認命，她說：「有邊個女人會想同人分享丈夫呀，但男人見到女人就鍾意，婚姻只係一份套餐咁，點會只食一樣，雄性天生就是播種的，男人唔會諗對女人有幾傷，女人唔忍就會連人都無埋。」夫妻間未能盡意做到十全十美，對工作仍然有心有力的白姐姐，即將上任做區議員，打算與同區的議員合租地方做辦事處，她說：「呢個區咁貴租，要幾個人夾，份人工好少只有萬幾元，開支唔小，分分鐘柯突（超支）。」已經十五年無打工的白姐姐，說起上一份在電台主持《盡訴心中情》的工作，仍耿耿於懷，「我仲想開咪，無錢我都會去做，我一路都有問商台港台，總有因素唔會俾我入去，可能我嘅爆炸力太強。」 ####
白韻琹小時候在樂活道聖瑪加利教堂受浸，來到教堂門前，不少教友恭喜她當選。
白姐姐落區做採訪，行到邊都有街坊跟她打招呼，年輕女街坊更趁機影合照。
經過豪宅禮頓山，保安哥哥即向白姐姐申訴門前的違例泊車問題。
白姐姐與禮頓山會所阿姐攬腰搭膊影合照。
選舉當日，白姐姐和阿Paul穿綠色戰衣，出動桃紅波子跑車上街拉票。
當選後白姐姐設宴慶功，好友麥玲玲（紅衫）到賀。
言行同樣出位的謝偉俊和白韻琹，早年曾雙雙拍裸照，轟動一時。
年輕時的她，有姿色才氣，身邊從不缺追求者。
回想中學那些年的日子，白姐姐話自己細個好曳，經常被老師罰坐無影櫈。
白姐姐與好友、趙世曾舊愛盈盈（左），常到老人院探訪、送曲奇，氹班老人家開心。
1137期
