補住瘦
一度淡出樂壇的關心妍（Jade），今年10月回巢星娛樂，決心要在造人前再踩紅館開個唱的她，除了將生B大計延期，更刻意節食做運動，變成100磅唔夠鋼條人。老婆日操夜操，老公楊長智睇唔過眼，落令飯可以唔食，但一定要進補搞好身體，關心妍亦聽足中醫指示，日日食花膠，補住唱紅綰。
一星期六千蚊
為下月中的紅館演唱會喪跑戒澱粉，減走二十三磅的關心妍，弗到夠膽著透視裝真空影海報，但紙板人身形卻令老公楊長智十分心痛，擔心老婆瘦出病，要她補住身體。
關心妍亦聽曬老公話，日前在公司同事陪同下，坐保母車到中環專賣富貴食品的有食緣入貨買花膠，在店內逗留唔夠二十分鐘，已經大包細包，之後又問店員要了幾隻價值六千多元大花膠，才碌咭俾錢走人。
一直睇開中醫調理身體準備佗B的關心妍，兩個月前為個唱戒飯節食，體質開始變弱，為要有氣有力應付個唱，醫生教要燉花膠進補，每朝早一大碗，一隻大花膠分量，夠食一星期；十一月開始，關心妍開始日日食花膠，連同明年二、三月於美、加及澳洲做巡迴，要食足五個月，埋單十萬。
壓力爆煲
除要求老婆補住操，楊長智還買了一隻價值五萬多元的健康錶，要老婆日日戴住。「Jade自從決定開個唱之後，個人變得好緊張，加上今次係佢生B前最後一擊，要求就更高，所以搞到好大壓力，又瞓得唔係幾好，有時仲會出現心跳過快情況，Jonas知道老婆做嘢好投入，勸都唔會聽，咪買隻有紓緩緊張情緒嘅錶俾佢，提醒佢要注意身體。」關心妍身邊人說。戴住老公心意，加埋日日食花膠進補雙管齊下的關心妍說：「中醫叫我連埋海參一齊食，可以養陰補氣，所以我近排狂做運動又節食，對健康都唔會有影響，本來我都唔會咁有恒心，不過Jonas就一定要我跟足醫生指示，佢話唔想見到我做完演唱會變人乾。」
安心待喜
娛樂圈近年掀起生B潮，加上明年龍年，已婚的劉德華、陳慧琳、楊千嬅，甚至有傳連未婚的楊思琦，都趕忙加入生龍B行列。 ####
鋼條都有睇頭㗎！（設計對白）
Jade當日以過萬元在有食緣連氣掃了幾隻花膠，在店內逗留二十分鐘左右，即拎住一大袋離開。
紀念相識五周年以及結婚兩周年，Jonas先後送了一個Celine手袋，及價值三十多萬的Hermés鱷魚皮手袋俾老婆。
近日出席活動，Jade都係戴住老公送的Phillip Stein健康手錶，知道要自動調節減壓。
有老公養唔憂做的Jade，四月時就同基督徒老友林以諾（左一），裕美（左二）以及黃智賢到以色列朝聖。
跟草蜢多年老友，今個演唱會，她亦邀請了草蜢一齊玩，不過她坦言勁舞部分要交俾老友孭飛。
未婚前的Jade脹蔔蔔，磅數更高達一百二十磅，減到一百磅唔夠，難怪老公詐型，要全力監察她食花膠補身。
○九年勁歌金曲頒獎禮，Jade誤攞了關菊英的獎座，雖然大擺烏龍，不過二人因而成為朋友，她更邀請對方做演唱會嘉賓。
陳慧琳早前復出接拍黃百鳴的賀歲片《八星抱囍》，但當時Kelly已接受人工受孕，直至上月出席活動，她公開宣布懷有「小籠包」5個月，並會減少公開活動，專心待產。
楊千嬅恨生仔恨到發燒的丁太楊千嬅，終於報喜；上月舉行五場《Minor Classic》演唱會，被發現放棄平時like爆的高踭鞋，赤腳上陣兼成個人圓曬，懷孕消息曝光，為免操勞，丁太連曾志偉的賀歲片也辭演。
郭羨妮與內地武指朱少傑今年4月在港低調註冊結婚時，郭羨妮已講明婚後會不設防勤力造人。完婚後，郭羨妮趕返內地拍攝《民國恩仇錄》，劇集煞科未幾，即傳出喜訊。（《蘋果日報》圖片）
1137期
