[東週刊][Dress Code]妮妲莉寶文 艷麗搶眼

艷麗搶眼

妮妲莉寶文Natalie Portman

產後首度現身任金球獎頒獎嘉賓嘅妮妲莉，已經回復昔日嘅窈窕身形，一身打扮亦好艷麗、亮眼，絕對想望多佢幾眼，桃紅色嘅色丁布料好彩冇一種厚重感，髮型同鑽飾亦為佢加添幾分復古味。佢喺頒獎禮上頒發劇情組影帝畀佐治古尼。

網評：

妮妲莉雖然細細粒，但著起呢條長裙一啲都唔累贅。（thefashion-court.com）

年少多好

愛瑪史東Emma Stone

新人王愛瑪嘅打扮繼續冇令大家失望，漸變色晚裝配水晶鷹皮帶，帶點玩味。雖然條裙大deep V，但唔會性感得過火，襯曬青春無敵嘅愛瑪，梳起嘅髮型及smokey eyes亦冇得彈。雖然佢冇獎攞，但佢主演嘅《寫出友共鳴》拍檔Octavia Spencer就贏得女配角獎。

網評：

愛瑪嘅打扮點都有啲驚喜，點睇都唔厭。（coolspotters.com）

身形粗壯

琦溫絲莉Kate Winslet

琦姐憑《慾海情魔》（Mildred Pierce）奪金球獎迷你劇/電視電影組別視後，兼有愛情滋潤，難怪發福不少。喺黑白晚裝下，佢睇落非常粗壯，而上半身嘅黑色部分太短，即時拉短佢嘅身形比例，就算開胸玩性感，都冇美感可言。

網評：

呢條裙令琦溫成個人睇落好厚、好短。（redcarpet-fashionawards.com）

女人味濃

謝茜嘉艾芭Jessica Alba

同樣產後復出嘅仲有謝茜嘉，佢亦回復昔日嘅火辣身材。佢於金球獎著上露肩晚裝騷靚膊，珠片晚裝亦十分高貴典雅，做咗媽媽嘅佢，愈見有女人味。

網評：

粉紫色似乎同佢嘅蜜糖膚色唔多襯，佢著sharp色少少會好睇好多。（celebritygossip.com）

紅白對比

安祖蓮娜祖莉Angelina Jolie

見到安祖蓮娜喺金球獎上嘅打扮，非常驚喜，由頭到尾貫徹紅白對比，打扮有種十分前衛嘅感覺，絕對係佢近期最出色嘅打扮。尤其愛佢嘅紅唇及化白咗嘅妝容，真係同呢個look襯到絕。當晚，佢頒發最佳導演獎畀執導《雨果的巴黎奇幻歷險》嘅馬田史高西斯。

網評：

安祖蓮娜當日嘅打扮非常特別，差啲認佢唔到，仲以為畢彼特拖住新女友。（fabsugar.com.au）

金光閃閃

妮歌潔曼Nicole Kidman

銀色襯金色永遠閃爆紅地氈，妮歌呢件晚裝繡滿金色窩釘，非常精緻，圖案充滿民族色彩，加埋金色首飾、clutch及金髮，襯到絕，又唔會太俗氣。當晚佢同奇里夫奧雲頒發最佳原創劇本獎，得獎嘅係活地亞倫嘅《情迷午夜巴黎》。

網評：

條裙令妮歌身材睇落非常S形，好火辣。（glamour.com）