單挑英皇三巨頭 陳奕迅寸古巨基唔夠班
新一代歌神兼吹神陳奕迅（ Eason）日前發功連寸英皇三巨頭容祖兒、古巨基及林峯，因而辣㷫基仔 fans，事緣 Eason上周六在港台《十大中文金曲頒獎禮》後台，嘲諷基仔不夠班與他鬥，導致兩幫 fans在高登討論區強烈開火。
當年被英皇雪藏、最終不愉快離開的陳奕迅，近日大發神威，發揮吹神本色，連環向英皇三巨頭容祖兒、古巨基及 Chok王林峯辣火頭。 Eason上周六在港台頒獎禮後台，接受視頻錄影訪問時更寸爆基仔不夠班做他的勁敵。
陳奕迅連環辣㷫英皇三大王牌基仔、祖兒和林峯，引來粉絲在網上罵戰。 設計圖片
Eason大前晚在微博貼上揸住勁歌獎座扮 chok樣的照片，勁寸林峯奪亞太獎。
基仔經理人 Mani日前在北京出席英皇晚宴，抽到一份大獎！
「是我的強敵嗎」
片段中， Eason起初表現風騷心情大靚，有人問他關於基仔不再攞獎， Eason以半鹹淡普通話說：「沒有呀，他說都是傳聞，好煩呀，他的問題要我回答，我只是跟他就……好奇問問看，然後……對啊！」記者問他：「驚唔驚冇咗個好強勁嘅對手呀？」 Eason反問記者：「好強勁嗎？」記者問他：「你覺得呢？」 Eason再反問：「你覺得呢？你們覺得是我的強敵嗎？你們覺得古巨基是我的強敵嗎？」 Eason見依然沒有記者回應，即說：「 OK， see！」
日前《勁歌》頒獎禮中，（左起）林峯、祖兒、王菀之和基仔成大贏家。
有反 Eason網友把反擊言論轉載到 Mani微博， Mani以三個憤怒表達對 Eason的不滿。
嘲容祖兒 Chok峯
祖兒 fans高登天後瓊姐在討論區進行「四台聯頒睾丸大獎」，暗嘲 Eason得單春。
Eason看不起基仔的言論片段被上載後，即時被網民瘋傳，基仔的 fans在高登討論區瘋罵 Eason，引起 Eason與基仔兩幫 fans在網上開火互鬧，有反 Eason言論的網民前晚即時轉載到英皇藝人管理部總監霍汶希（ Mani）的微博以示不滿， Mani亦以三個好憤怒的表情公仔表示贊同。
而一向是祖兒 fans的網友高登天後瓊姐亦感憤怒，在高登討論區張貼「四台聯頒睾丸大獎」數歌手睾丸數目，暗嘲 Eason早年因意外跌落台導致單春事件。
Eason又寸爆祖兒，事緣上周六在港台頒獎禮慶功宴上，當被問到會否與祖兒比較今年攞獎數目，他即說：「唔係我要同佢比，係佢要同我比呀！我家係大中華歌手，獎項係唔重要，家講緊歌手嘅國際地位問題，同劉生（劉德華）、張生（張學友）地位距離拉近。」之後祖兒在無綫《勁歌》頒獎禮慶功宴還擊，反寸他是爛片王。
Eason寸完祖兒，周日《勁歌》頒獎禮結束後，他再在微博上載一張拿住《勁歌》獎座扮 chok樣攞獎的照片，寫道：「 Chok咗成分鐘都等唔到個特寫！」寸爆 Chok王林峯三連霸成為亞太區最受歡迎香港男歌星及憑冷門歌《 Chok》奪金曲金獎。
膝頭磨損做手術
Mani昨日接受電話訪問時表示，與 Eason做過幾年同事，很了解他玩得的性格，但她坦言：「玩唔緊要，但站喺經理人立場，睇完我係有少少唔舒服，我唔係憤怒，只係有少少不安。」英皇行政總裁吳雨昨日亦說：「希望佢講笑啦，不嬲都知佢嬉笑怒罵。」會不會為三位愛將討回公道？吳雨說：「希望佢真係只係講笑啦，我睇完都好奇怪，好詫異。」
而辣著火頭的 Eason因膝頭磨損正在醫院做手術，不過他透過助手澄清網上所瘋傳之訪問片段，他說：「當日訪問全部都係記者問我，我只係反問記者，當時現場冇人答我，所以至變成咁，我絕對唔係講古巨基，亦唔係針對基仔，只係大家成日攞我同基仔搞是是非非，對呢啲是非話題覺得好悶，樂壇唔係咁樣，從來唔覺得有需要惡性競爭。」他強調：「我冇敵人！」 Eason經理人陳家瑛亦在電話中說：「佢玩之嘛，佢反鬥星嚟㗎，佢同基仔係朋友，唔係勁敵，佢哋兩個同一陣線都係為樂壇付出。」 Eason視頻訪問的言論令 Mani不安，陳家瑛即說：「哎吔，我要打番畀 Mani。」
採訪：葉雪
陳奕迅寸基仔全文
陳：陳奕迅 記：記者
記：有傳古巨基將宣佈永不拿獎。
陳：沒有呀，他說都是傳聞，好煩呀，他的問題要我回答，我只是跟他就……好奇問問看，然後……對啊！
記：你驚唔驚冇咗個好強勁嘅對手呀？
陳：好強勁嗎？
記：你覺得呢？
陳：你覺得呢？你們覺得是我的強敵嗎？你們覺得古巨基是我的強敵嗎？
記：哈……（全場靜默）
陳： OK， see？
陳奕迅 vs古巨基
陳奕迅
年齡： 37
出道： 95年參加第 14屆新秀歌唱比賽奪冠入行
今年四大頒獎禮獎項： 12個
演唱會場數：前年 3月 18場紅館個唱
威水史：今年 4月 Eason將於倫敦 O2Arena開騷，門票在 20分鐘內售罄，比 Lady GaGa更快。
古巨基
年齡： 39
出道： 91年主持無綫節目《娛樂新聞眼》出道
今年四大頒獎禮獎項： 5個
演唱會場數：去年 10月 3場紅館個唱
威水史： 05年入選香港十大傑青、連續 4屆成為《勁歌》最受歡迎男歌星，平了譚詠麟紀錄。
資料來源：《蘋果》資料室
兩派 Fans掀罵戰
陳奕迅寸古巨基的視頻瘋傳，搞到兩派支持者互罵， Eason粉絲撐他寸得起，但有網民狂插 Eason不懂尊重別人。
Eason粉絲
妍希 BB：啲人成日搵佢同古巨基比，講得多都煩啦。
鳥嬉霜雨間：事實上又抵佢咁寸嘅，古巨基真係爆鳥都追唔上。
踢死你：事實總是令人難以接受吧，忠言逆耳。
侏儸：好寸，但真係寸得起。
Irice：唔係強敵可以係好朋友㗎嘛，心情唔好咁講出來又要曲解人哋， Eason有冇話過古生垃圾先？
基仔粉絲
難過得要死：倒垃圾的人都應該被尊重，陳奕迅唱埋成堆懶係有意思的歌，都只係得個「唱」字，係假的！
三條毛蟲：冇禮貌！天王巨星就可以不留情面咁話人咩？
金晨曦：陳奕迅做乜佢哋都話有感染力，型棍㗎啦！
Tearoom：古巨基默默耕耘咁多年都安守本份，掂咗唔使咁踩人啊！
蝴蝶姐姐好正：咁樣講嘢好唔厚道。
資料來源：高登討論區
話你知
拍爛片與英皇決裂
陳奕迅與楊受成（左）旗下的英皇早年曾有過節，他在 00年曾簽約英皇，在這段時期推出過不少大賣專輯如《打得火熱》、《 Shall We Dance？ Shall We Talk！》及《 The Easy Ride》等，當時他更橫掃多個頒獎禮，演唱會賣個滿堂紅。
但這期間，英皇為 Eason接了很多他不想拍的電影，如《賤精先生》和《慳錢家族》等，令他不能專心唱歌，雙方關係越來越差。 03年他約滿英皇萌去意，英皇得知後索性將他雪藏，轉捧其他新人，令 Eason轉會前除接拍電影，當年歌唱事業幾乎全面停頓。
Eason︰我語氣令大家誤會
陳奕迅（Eason）日前在港台頒獎禮後台接受電子傳媒訪問，網友將他訪問時黑面說：「你們覺得古巨基是我的強敵？」片段瘋傳，有網友批評Eason說話冇品欠大將之風，更引起兩邊粉絲罵戰，基仔經理人霍汶希（Mani）也表示：「如果Eason真係咁講，就贏獎輸品。」
而Eason昨日表示：「我嗰句說話唔係講基仔，係反問現場嗰班記者，可能我語氣、神態上令大家誤會。」他坦言大家經常將歌手比較，令他感到很煩，他說︰「喺我心目中只有朋友，無敵人。」
玩都要尊重人
Eason經理人陳家瑛相信Mani不會為這種事嬲，她說：「大家都明白呢行，雖然我冇睇過條片，但個仔貪玩，成日訪問時同記者講笑。」Mani坦言沒有嬲，她說：「只係睇完條片我有啲唔舒服，我同Eason都共事幾年，好熟佢性格，佢鍾意講笑，但講笑要有底線，玩時玩都要尊重人，唔好令人唔舒服。」
