明晚擺酒50圍 李思欣範振鋒挑剔揀蛋糕
李思欣嫁DJ範振鋒（Ricky）平搞豪華婚禮，皆因婚紗、去關島註冊結婚、場地佈置、攝影錄像、化妝整頭，甚至結婚蛋糕等均有贊助，連買餅卡都有優惠折頭，加加埋埋慳到超過30萬洗費！但做得夠體面，一啲都唔失禮。最開心係，範振鋒唔使放水娶老婆，齋賺人情都幾爽。
本周六（即15日）係李思欣和範振鋒大喜日子，雖然兩人已於去年12月8日在關島註冊結婚，老人家卻揀定好日於酒店補擺喜酒，筵開50席招呼親友。這一對新人雖然平搞婚禮，但要派頭，唔可以失禮，連結婚蛋糕都親自揀選，唔可以求求其其。
上周，兩人便手拖手去到贊助的美心餅店揀選結婚蛋糕，於新婚系列蛋糕小冊子中左揭右揭，睇足半個小時，最後選中三層高，名為「愛的禮物」蛋糕。思欣說：「我鍾意簡潔清雅款式，要以白色為主，咁至可以襯到場內香檳玫瑰佈置，顏色太sharp唔配合。」範振鋒點頭回應：「因為賓客眾多，包括思欣好朋友鍾嘉欣、楊秀惠、姚子羚等，仲有譚詠麟、明星足球隊成員、黎耀祥、麥包……個蛋糕唔可以太細，都好多人想食蛋糕㗎嘛。」
屈指一算，狂搵贊助的範振鋒慳到大筆老婆本，咁娶老婆咪有得賺？他卻矢口否認說：「唔會咯，因為擺酒冇贊助，要成一萬蚊一圍，我請親戚、夥計員工多，唔通叫佢地做足人情咩？」範振鋒又忍不住呻：「原先都搵到酒席贊助，可惜場地要一早book定，真係遲咗一步，唔係慳得仲多呀，最開心係，贊助商永遠畀最好嘅嘢出嚟，真係畀足錢都唔夠我咁好呀。」範振鋒，你係得嘅！
兩人到贊助的美心餅店揀選結婚蛋糕。 
兩人新婚燕爾，揀蛋糕都揀得甜過人。 
李思欣和範振鋒在關島的教堂結婚。
