《天與地》餘威《4 In Love》食住上

忽然1周第861期

電視有正嘢

《天與地》餘威　《４ In Love》食住上

2012年01月27日

戚其義監製、周旭明編導嘅《天與地》，雖然開播以來有口碑卻收視差，但大結局卻攞番個尾彩，圓滿落幕之餘，更成為全城熱話。一向最識打鐵趁熱嘅無綫，即食住《天》嘅餘威，接住推出《４ In Love》。

《４》幾乎係《天》原班人馬演出。內容加入咗唔少新元素，譬如飾演大明星嘅佘詩曼愛上車房仔陳豪、金融才俊金剛遇上情場女殺手簡慕華等。正如戚其義話齋﹕「《４ In Love》係另一部破格之作。」

佘詩曼飾演嘅國際巨星，利用汽車修理技工製造假緋聞。

跟 MK仔相處落嚟，大明星竟然開始融入平民化生活。

我呢隻癩蛤蟆終於食到天鵝啦！

戚其義同周旭明喺《天與地》大玩人食人，被喻為無綫歷年最破格嘅電視劇，無綫食住《天》嘅餘威，推出由陳豪、佘詩曼、黃德斌、葉翠翠及金剛主演嘅《４ In Love》。

故事以幾段愛情故事穿插﹕其中佘詩曼跟陳豪一段，跟曉格蘭特及茱莉亞羅拔絲嘅《摘星奇緣》好相似。國際巨星佘詩曼利用一個 die hard粉絲車房仔陳豪嚟塑造自己嘅親善形象。原本諗住只係做俾外界睇嘅一台戲，誰不知相處下來，大明星竟然對呢個車房仔真的愛上了，由此締造咗一段荒誕、有血有肉嘅情感關係。

除此之外，體育主播黃德斌愛上同事鄧梓峰老婆江欣燕、金融才俊金剛跟簡慕華由只求情慾，到最後被真情征服、以及控煙辦主任韋家雄同葉翠翠一段長短腳之戀等。據講韋家雄拍此劇時，對葉翠翠真係 fall in love，可惜襄王有夢，但無形中亦為此劇製造咗一個話題。

嗱，長氣啲講多句，呢套劇同《天與地》無關㗎，而且《 4》內容輕鬆易消化，唔似《天與地》咁難啃，絕對適合普羅大眾，尤其師奶觀眾。

飾演控煙辦主任嘅韋家雄，因世俗眼光而拒絕愛高自己 5吋嘅葉翠翠。