振英哥向本集團開火，何老闆開記者會猛烈回敬，當日電視直播收視奇高，小弟好多老友睇完後即打電話嚟議論一番，可以話係上周城中最熱話題。有趣係，事發後冇耐，本刊記者發現振英哥忽然現身將軍澳壹傳媒總部，陪同嘅仲有競選左右手張震遠，逗留個幾鐘才離開。
壹傳媒旗下生果報一直對振英哥唔多客氣，將他定性為狼，當正他是共產黨，為何佢老哥忽然身入虎穴，莫非想化敵為友？
本刊其後打聽得知，振英哥原來是應《壹週刊》社長楊懷康之邀，同張震遠一齊出席設於壹大樓VIP Room之飯局，該刊幾名高層都有在場。其實振英哥同《壹》仔高層食聯誼飯已非首次，一年前他就去過同樣飯局，都是由楊社長做東，當時已有高層問他是否選特首，可能因時機未成熟，他未置可否，但參賽之意已呼之欲出，而同傳媒打好關係的態度亦很明顯。
振英哥座駕駛入將軍澳壹傳媒總部，張震遠陪伴左右。進入大樓後，《壹週刊》高層在門口相迎。（調查組攝）
振英哥早已同《壹》仔交好，所以早前特別同該刊做了個專訪，詳細講述自己的身世及從政之路，編輯亦處理得好正面，只是封面用了「投共之路」做標題，令人覺得小小負面。
不過楊社長在上期《壹》仔之「中環人語」話振英哥搵個阿叔去山頂豪宅洗魚缸，有人黑口黑臉，叫阿叔小心啲，千祈唔好打爛玻璃，整死珊瑚，賠唔起o架。篇文出街後，振英哥鄭重致函楊社，否認有此事，說自己家中從未有玻璃魚缸，對方擺明作嘢。楊社在專欄將來函照登，但仍「潤」振英哥幾句。不過這只是小事一宗，似未影響雙方友好關係，振英哥今次專程登門拜訪，就是最好證明。所以話，政治永遠只有利益，沒有敵友。
