外來語
《天與地》C9睇唔明，都係回歸八卦新聞穩陣啲。荷里活「情場鬼見愁」里安納度早前先分手兩個月之嘛，即傳出佢秒殺兩嫩模。不過花弗處未算花弗。就上周四（15日）金球獎公布候選名單，里安眾望所歸有份角逐影帝。喺心情大好之下，里安亦乘機攜新歡出巡，蜜遊公園。事業、愛情皆得意。
This city或者真係如《天與地》所講dying中，但里安納度（Leonardo DiCaprio）嘅獵女本色，永遠不死。今年5月，佢同「花邊教主」Blake Lively拍拖，遊咗半個歐洲，捱咗5個月貨仔，雙方卒之頂唔順，於10月初發聲明分手，成為圈中熱話。
貫徹口味
你當戲睇又好，當笑柄又好，里安一於少理繼續集郵。早前佢喺澳洲拍攝《小城大亨》時，被指搭上當地兩嫩模。點知櫈都未坐暖，轉個頭，里安已被目擊攜新女遊公園。據知新女叫Erin Heatherton，芳齡22，比「花邊教主」再小兩歲，夠曬嫩口。加上身材高䠷，金髮、長腿並重，而且仲係著名內衣Victoria's Secret禦用model，啱曬里安口味。就當日所見，里安同新歡漫步悉尼公園。雖然兩人冇親密動作，但不時喁喁細語，男方仲輕撫女方玉背，相當sweet sweet。不過及後兩人發現記者，Erin即拔足狂奔，一邊走仲一邊露出招牌長腿，完全不顧儀態。
Erin早前更全裸拍攝黑白寫真， 動作豪放，意識大膽。
有望殺入奧斯卡
戀情剛啱萌芽，怕醜尚算人之常情。不過Erin都係時候習慣吓。事關愛郎早前憑《J•艾德格》角逐金球影帝，大有機會再下一城殺埋入奧斯卡。到時里安出入頒獎禮，身邊冇個花瓶點綴吓又點成事？不過Erin捱到咁耐先算啦。
金球獎常客
現年37歲嘅里安曾先後5次角逐金球影帝，可以話係金球獎常客，可惜提名多攞獎少，最終於2005年憑《大娛樂家》成功封帝。今次《J．艾德格》根據真人真事改編。劇情講里安飾演FBI局長J．Edgar Hoover，佢一邊保衞國家，一邊政治角力。特別之處，係里安需要由後生做到老，仲要隱瞞自己性取向，難度十分之高。
金球獎戲劇組男主角入圍名單
稱帝有難度
上周四（15日）金球獎公布入圍名單，里安納度有份角逐戲劇組「最佳男主角」。如果靚仔有着數，里安肯定有優勢。問題係候選靚仔唔止佢一個，畢彼特亦係其中之一。不得不提嘅，仲有佐治古尼，今勻佢憑《繼承大丈夫》角逐影帝，但佢執導嘅《選戰風雲》口碑不俗，除獲提名「最佳戲劇組電影」、「最佳導演」，更帶挈另一男主角賴恩高斯寧入圍「最佳男主角」。里安想再稱帝，確係唔容易。 ####
囡囡，里安叔叔嚟喇!（設計對白）兩人後來發現狗仔隊， 被人影慣影熟嘅里安闊佬懶理，施施然咁行， 相反佢新歡就驚惶失措，不惜露腿急急腳走人。
里安邊行邊輕撫Erin玉背，有風度又細心。
22歲嘅Erin Heatherton高5呎11吋， 三圍33/24.5/34，標準模特兒身材。中學時期去海灘時被發掘入行， 2008年正式擔任著名內衣Victoria's Secret禦用model，係模界炙手可熱嘅新星。
Victoria's Secret每年搞內衣騷， 必定成為全城熱話。今年9月Erin（左二）就同Victoria's Secret其他師姐一齊出席活動，靚爆全場。
里安分手後火速女，Blake亦不甘示弱， 同《綠燈俠》賴恩雷諾士撻着，早前更被拍得當眾咀嘴（右圖）。
老版里安，一樣咁型。
先聲奪人米高法斯賓達憑《色辱》封威尼斯影帝，率先攞頭彩，有望於金球再度稱帝。
捲土重來畢彼特2009年憑《奇幻逆緣》角逐影帝，可惜鎩羽而歸， 今年捲土重來，但勝算唔高。
再等吓先佐治古尼自導自演《選戰風雲》，以為可以大包圍贏曬啲獎， 點知被同劇嘅賴恩高斯寧跑出。
型佬突破向來型佬嘅佐治古尼，今次喺《繼承大丈夫》一改形象飾演失敗老竇，演技備受讚賞，被睇好有機會稱帝。
856期
